راولپنڈی: تھانہ مری کے علاقے میں قبضہ گروپوں کے خلاف پولیس نے کارروائی کرکے 5ملزمان کو گرفتار کرلیا جن کے قبضے سے بھاری مقدار میں غیرقانونی اسلحہ بھی برآمد ہوا۔
تفصیلات کے مطابق پولیس کا کہنا ہے کہ 2 قبضہ گروپوں نے باہمی تصادم کے بعد سڑک بلاک کر دی تھی، ملزمان کے خلاف مقدمات درج کر لیے گئے۔
ایس پی صدر رائے مظہر اقبال نے سٹی پولیس آفیسر ڈی آئی جی محمد فیصل رانا کو بریفنگ دیتے ہوئے بتایا کہ تھانہ مری کے علاقہ میں 2قبضہ گروپوں کے مابین تصادم ہوا جس کے بعد ملزمان نے سڑک بلاک کر دی۔
پولیس نے اطلاع ملنے پر فوری کارروائی کرتے ہوئے روڈ کو کلیئر کروا کر دونوں گرپوں کے5 ملزمان احسان اکرم، ذیشان، پرویز، امجد علی اور محمد نذیر عرف پپو کو گرفتارکرکے ان سے بھاری مقدار میں ناجائز اسلحہ بر آمد کر لیا۔
ملزمان کے خلاف تھانہ مری میں مختلف دفعات کے تحت مقدمات درج کر لیے گئے، سی پی او فیصل رانا نے قبضہ گروپوں کے خلاف بروقت کارروائی پر ایس پی صدر کو شاباش دیتے ہوئے کہا کہ ملکہ کوہسار مری کے علاقہ میں سڑک کا بلاک ہونا کسی بھی صورت اور کسی بھی قیمت پر قابل برداشت نہیں۔
انہوں نے کہا کہ پولیس قبضہ گروپوں اور ناجائز اسلحہ رکھنے والوں کے خلاف منظم انداز میں آپریشن کرے کیوں کہ ہم نے ہر صورت پنڈی کو اسلحہ فری بنانا ہے۔
