سی پی او سید شہزاد ندیم بخاری کی ہدایت پر پولیسنگ میں گونگے، بہرے، نابینا افراد سمیت اسپیشل افراد کے لئے سائن لینگویج متعارف کروانے کا اعلان کیا ہے۔
راولپنڈی ترجمان پولیس کے مطابق سی پی او سید شہزاد ندیم بخاری کے ویژن کی بدولت نجی تنظیم تھانے آنے والے گونگے، بہرے، نابینا افراد سمیت اسپیشل افراد کو معاونت فراہم کرے گی۔
ترجمان پولیس نے بتایا کہ نجی تنظیم ”اسپرنگ” کے نام سے اسپیشل افراد کے لئے کام کر رہی ہے، سائن لینگویج کے ماہرین اسپیشل افراد کا مسئلہ سمجھ کر پولیس کو کمپلینٹ اور شہادت وغیرہ ریکارڈ کرنے میں معاونت فراہم کریں گے۔
ترجمان پولیس کا کہنا ہے کہ سائن لینگویج کے ذریعے گونگے، بہرے، نابینا اور دیگر اسپیشل افراد اپنا مسئلہ یا بیان بہتر انداز میں ریکارڈ کروا سکیں گے۔
راو؛پنڈی کی پولیس ترجمان کا مزید کہنا تھا کہ ماہرین ویڈیو کال کے ذریعے اسپیشل فرد کی بات سمجھ کر پولیس کو بیان کرنے کے لئے 24/7 دستیاب ہوں گے، اس کے علاوہ پولیس افسران کو بھی سائن لینگویج کی تربیت دی جائے گی۔
