پولیس اینیمل ریسکیو سینٹر راولپنڈی نے ممنوعہ نسل کے طوطوں کو قید کرنے والے 2 ملزمان کو گرفتار کرلیا۔
تفصیلات کے مطابق پولیس اینیمل ریسکیو سینٹر راولپنڈی نے کارروائی کرکے ممنوعہ نسل کے طوطوں کو قید کرنے والے دو ملزمان کو گرفتار کرلیا اور ان کے غیر قانونی طور پر قید ممنوعہ نسل کے طوطے برآمد کرلئے۔
ترجمان پولیس کے مطابق ملزمان نیاز اور عاصم نے طوطوں کے پر کاٹے اور انہیں بھوکا پیاسا بھی رکھا، اطلاع ملنے پر پولیس اینیمل ریسکیو سینٹر راولپنڈی کی ٹیم نے کارروائی کرتے ہوئے ملزمان سے طوطے برآمد کر لئے۔
ترجمان کا کہنا ہے کہ ملزمان کے خلاف جانوروں پر ظلم سے متعلق ایکٹ سمیت دیگر دفعات کے تحت الگ الگ مقدمات تھانہ سٹی میں درج کئے گئے ہیں، برآمد کئے گئے پرندوں کو علاج معالجہ اور تحفظ کے لئے پولیس اینیمل ریسکیو سینٹر راولپنڈی میں رکھا گیا ہے۔
