راولپنڈی : برساتی نالے سے خاتون کی لاش برآمد ہوئی ، تاہم لاش کی شناخت نہ ہو سکی، خاتون کی عمر 35سے 40 سال کے درمیان ہے۔
تفصیلات کے مطابق راولپنڈی میں تھانہ رتہ امرال کے علاقے میں برساتی نالے سے خاتون کی لاش ملی ہے، پولیس نے بتایا کہ خاتون کی عمر 35سے 40 سال کے درمیان ہے تاہم شناخت نہ ہو سکی۔
یاد رہے راول پنڈی اور اطراف میں علی الصباح بارش نےجل تھل ایک کر دیا، جس کے بعد مختلف مقامات پر سڑکیں اورگلیاں تالاب کا منظر پیش کرنے لگیں اور نالہ لئی کی سطح انتہائی بلند ہوگئی۔
موسلادھار بارش کے باعث شہرکے کئی علاقے پانی میں ڈوب گئے، بارش کا پانی گھروں میں بھی داخل ہوگیا۔
محکمہ موسمیات کے مطابق جڑواں شہروں میں اب تک اڑسٹھ ملی میٹر بارش ریکارڈ ہوئی،سب سے زیادہ بارش سیکٹر آئی بارہ میں اڑسٹھ میٹر ریکارڈ ہوئی۔
واساعملہ نشیبی علاقوں میں نکاسی آب کے آپریشن میں مصروف ہے اور نالہ لئی میں پانی کی سطح کو مسلسل مانیٹر کیا جا رہا ہے، کٹاریاں کےمقام پر8 فٹ،گول منڈی پر 4 فٹ پانی کی سطح ریکارڈکی گئی۔
