اسلام آباد: مشیر برائے امور نوجوانان عثمان ڈار نے مشیر تجارت عبد الرزاق داؤد سے ملاقات کے دوران کہا کہ ینگ انٹر پرنیور شپ اسکیم کے تحت نوجوانوں کو کاروبار کے لیے قرضہ فراہم کیا جائے گا۔
تفصیلات کے مطابق مشیر تجارت عبد الرزاق داؤد سے مشیر برائے امور نوجوانان عثمان ڈار کی ملاقات ہوئی۔ ملاقات میں ینگ انٹر پرنیور شپ اسکیم پر تبادلہ خیال کیا گیا۔
مشیر برائے امور نوجوانان عثمان ڈار کا کہنا تھا کہ اسکیم کے تحت نوجوانوں کو کاروبار کے لیے قرضہ فراہم کیا جائے گا، صنعتوں کے لیے وزارت صنعت پیداوار کے ادارے سمیڈا کا تعاون اہم ہے۔
انہوں نے کہا کہ سمیڈا ملک میں ینگ انٹر پرنیورز کو ہر ممکن سہولت فراہم کرے گا۔
مشیر تجارت رزاق داؤد کا کہنا تھا کہ ینگ انٹر پرنیورشپ اسکیم ایک احسن اقدام ہے، ملک کی معاشی ترقی کے لیے نوجوانوں کا کردار اہم ہے۔
اس سے قبل ورلڈ یوتھ منسٹرز کانفرنس سے خطاب کرتے ہوئے عثمان ڈار کا کہنا تھا کہ ملکی تقدیر نوجوانوں کے ہاتھوں بدلے گی۔ صحت، روزگار اور اصلاحاتی پروگرام سمیت اکنامک خود مختاری پر کام جاری ہے۔ پاکستان نوجوانوں کے لیے تیزی سے اصلاحاتی ایجنڈے پر کام کر رہا ہے۔
انہوں نے کہا تھا کہ موجودہ حکومت نے پہلی بار نوجوانوں کے لیے اسٹریٹیجک روڈ میپ تشکیل دیا، ’کامیاب نوجوان پروگرام‘ موجودہ حکومت کا لینڈ مارک منصوبہ ہے۔ وزیر اعظم عمران خان کی قیادت میں نوجوانوں کو بااختیار بنانے پر پوری توجہ ہے۔
