نئی دہلی: کرونا کے بڑھتے کیسز کے باعث بھارت میں آئی پی ایل کا انعقاد خطرے میں پڑگیا ہے۔
تفصیلات کے مطابق آئی پی ایل کا 14 واں سیزن رواں ماہ کی نو تاریخ سے چنئی میں شروع ہورہا ہے، پہلے میچ میں ممبئی انڈینز اور رائل چیلینجرز بنگلور آمنے سامنے ہونگے۔
بھارتی لیگ شروع ہونے سے قبل ہی اس کے انعقاد پر سوالیہ نشان لگ گیا ہے، کیونکہ متعدد کھلاڑی اور کوچنگ اسٹاف کرونا کا شکار ہونے لگے ہیں، آئی پی ایل کھیلنے والے آسٹریلیا کےڈینیل سیم کرونا میں مبتلا ہوگئے ہیں۔
Official Statement: Daniel Sams checked into the team hotel in Chennai on April 3rd, with a negative COVID report on arrival. His report from the 2nd test on 7th April came positive. Sams is currently asymptomatic and he is currently in isolation at a designated medical facility.
— Royal Challengers Bangalore (@RCBTweets) April 7, 2021
کرونا ٹیسٹ مثبت آنے کے بعد آسٹریلیا کے آل راؤنڈر کو اسکواڈ سے الگ کرتے ہوئے قرنطینہ کردیا گیا ہے، جہاں ڈاکٹرز کی ٹیم ان کی مسلسل نگہداشت میں مصروف ہے۔
اس سے قبل سابق بھارتی کرکٹر اور ممبئی انڈینز کے ٹیلنٹ اسکاؤٹ کِرن مورے بھی کورونا سے متاثر ہوئے، ممبئی ٹیم نے اپنے بیان میں کہا کہ ‘مورے میں اس وقت بیماری کی کوئی علامات نہیں ہے لیکن انہیں آئیسولیٹ کردیا گیا ہے۔
بیان میں کہا گیا کہ ممبئی انڈینز اور کِرن مورے اس معاملے میں بی سی سی آئی کے صحت سے متعلق رہنما خطوط پر مکمل عمل کررہے ہیں۔
واضح رہے کہ دہلی کیپٹلز کے لیفٹ آرم اسپنر اکشر پٹیل اور رائل چیلنجرز بنگلور کے بلے باز دیودت پڈیکل بھی کورونا کی زد میں آچکے ہیں۔
دوسری جانب گزشتہ چوبیس گھنٹوں کے دوران بھارت میں کرونا وائرس کے 115736 نئے کیسز سامنے آئے، جس کے بعد مثبت کیسز کی مجموعی تعداد 12801785 تک جاپہنچی ہے۔
اسی طرح گذشتہ چوبیس گھنٹوں میں کرونا کے باعث بھارت میں 630 افراد کی اموات ہوئیں، جس کے بعد کرونا سے ہلاک ہونے والوں کی تعداد بڑھ کر 166177 ہوگئی ہے۔