اسلام آباد : چیئرمین تحریک انصاف عمران خان نے تنظیمی ڈھانچے میں بنیادی تبدیلی کا فیصلہ کرتے ہوئے پارٹی میں تنظیم نو کی منظوری دے دی۔
تفصیلات کے مطابق اسلام آباد میں چیئرمین پی ٹی آئی عمران خان سے پارٹی سیکریٹری جنرل ارشد داد نے ملاقات کی، ملاقات میں تحریک انصاف کی تنظیم نو کے حوالے سے اہم امور پر تفصیلی غور و خوص کیا گیا۔
اس موقع پرتحریک انصاف کے تنظیمی ڈھانچے میں بنیادی تبدیلی اور پی ٹی آئی کے پنجاب اور پختونخوا میں ریجنز کے خاتمے کا فیصلہ کیا گیا اس کے علاوہ نئے نظام کے تحت ریجنز کی جگہ ڈویژنز کی بحالی کا فیصلہ بھی کیا گیا۔
ملاقات میں فیصلہ کیا گیا کہ اگلے مرحلے میں صوبائی، ڈویژنل، ضلع اور تحصیل سطح پر پارٹی ڈھانچہ ترتیب دیا جائے گا، مقامی سطح پر تنظیمی ڈھانچے کا تقرر مقامی حکومتوں کے نظام سے مطابقت میں کیا جائے گا۔
چیئرمین پی ٹی آئی عمران خان نے پارٹی چیئرمین کی سیکرٹری جنرل کو تنظیمی ڈھانچے بلاتاخیر مکمل کرنے اور تنظیم سازی کے ساتھ پارٹی آئین کا عمل بھی جلد از جلد مکمل کرنے کی ہدایت کی، اس موقع پر چیئرمین پی ٹی آئی کی ہدایات پر نئے تنظیمی ڈھانچے کیلئے باضابطہ نوٹیفکیشن جاری کردیا گیا۔
