لاہور: دنیا پیپلزپارٹی اور ن لیگ کی سیاست پر ہنس رہی ہے، الیکشن کے وقت یہ دشمن اور چوری پکڑی جائے تو اکٹھے ہوجاتے ہیں.
ان خیالات کا اظہار پی ٹی آئی کے سینیٹر فیصل جاوید، وزیر ریلوے شیخ رشید اور جی ڈی اے کی نصرت سحر عباسی نے اے آر وائی نیوز سے خصوصی گفتگو کرتے ہوئے کیا.
یاد رہے کہ آج پیپلز پارٹی کے چیئرمین بلاول بھٹو نے اپنی طویل پریس کانفرنس میں پی ٹی آئی حکومت، اس کے اتحادیوں اور نیب کو شدید تنقید کا نشانہ بنایا تھا.
اس ضمن میں سینیٹر فیصل جاوید کا کہنا تھا کہ عمران خان نے جو سیاست کی، وہ ملک سے غربت کے خاتمے کے لئے ہے.
انھوں نے کہا کہ بلاول کی نوازشریف سےمتعلق کچھ دن پہلے کی تقریر دیکھ لیں، سب سمجھ آجائے گا، الیکشن کے وقت یہ دشمن اور چوری پکڑی جائے تو اکٹھے ہوجاتے ہیں.
بلاول بھٹو کی نیب پر کڑی تنقید، چیئرمین نیب سے اپنے لوگوں کے احتساب کا مطالبہ
جی ڈی اے کی رہنما اور رکن سندھ اسمبلی نصرت سحر عباسی نے کہا کہ یہ وہ لوگ ہیں، جو ایک باری ہماری اور ایک تمھاری کھیل رہے ہیں، دنیا پیپلز پارٹی اور ن لیگ کی سیاست پر ہنس رہی ہے.
خیال رہے کہ اپنی پریس کانفرنس میں بلاول نے پی ٹی آئی کے وزرا کے کالعدم تنظیموں سے رابطہ کا الزام عائد کیا تھا.
اس ضمن میں شیخ رشید نے ردعمل دیتے ہوئے کہا کہ بلاول کس کی طرف اشارہ کر رہے ہیں، مجھے معلوم نہیں.
انھوں نے کہا کہ بلاول میرا نام لینے سے شرماتا کیوں ہے، بلاول بھٹو کو مجھ سے تکلیف ہے تو میرا نام لے میں دور کروں گا.
