اسلام آباد: ریئل اسٹیٹ تجزیہ کار احسن ملک کا کہنا ہے کہ انڈسٹری پر زیادہ ٹیکس لگانے سے مزید سرمایہ پاکستان سے باہر چلا جائے گا۔
احسن ملک نے اے آر وائی نیوز سے خصوصی گفتگو میں کہا کہ ریئل اسٹیٹ پر ٹیکس بڑھانے سے ٹیکس آمدن مزید کم ہو جائے گی اور اوورسیز پاکستانی بھی سرمایہ کاری نہیں کریں گے۔
انہوں نے مطالبہ کیا کہ حکومت بجٹ میں ریئل اسٹیٹ کے شعبہ کو مکمل تباہی سے بچائے، بلند شرح سود نے ہاؤسنگ انڈسٹری کو تباہی کی نہج تک پہنچا دیا ہے، ہاؤسنگ سے منسلک 45 صنعتیں بھی مسلسل گھاٹے میں ہیں۔
خیال رہے کہ سالانہ وفاقی بجٹ 25-2024 میں بھاری ٹیکس عائد کرنے پر تاجر اور صنعت کاروں کی جانب سے تشویش کا اظہار کیا جا رہا ہے۔
اس سے قبل بجٹ میں بھاری ٹیکسوں کے نفاذ پر تحفظات کا اظہار کرتے ہوئے ٹیلی کام آپریٹرز ایسوسی ایشن نے اس سلسلے میں چیئرمین قائمہ کمیٹی خزانہ کو ایک خط لکھا تھا جس میں ملک سے غیر ملکی سرمایہ کاری نکلنے کی وراننگ دی تھی۔
ٹیلی کام آپریٹرز نے کہا تھا کہ ٹیکس معاملات حل نہ ہونے سے حکومت کیلیے قانونی مسائل پیدا ہو سکتے ہیں، دو بڑے مارکیٹ پلیئرز پہلے ہی پاکستان چھوڑ کر جا رہے ہیں، سیکٹر نے گزشتہ سال 340 ارب روپے کی ٹیکس وصولی میں کردار ادا کیا، اس شعبے میں اب تک براہ راست 15 ارب ڈالر کی سرمایہ کاری آئی۔
خط میں لکھا گیا تھا کہ بجٹ تجاویز پر عمل درآمد سے ڈیجیٹل پاکستان کا خواب بھی بری طرح متاثر ہوگا، نان فائلر ٹیلی کام صارفین سے 75 فی صد ایڈوانس ٹیکس وصولی قابل عمل نہیں، اس فیصلے سے ٹیلی کام شعبے اور حکومت کو محصولات کا نقصان ہوگا۔
ٹیلی کام کمپنیوں نے انکم ٹیکس جنرل آرڈر پر بھی تحفظات کا اظہار کیا تھا۔ خط میں لکھا گیا تھا کہ نان فائلرز کی سمز بلاک کرنے کے معاملے پر ٹیلی کام سیکٹر پر جرمانوں پر غور کیا جائے، ٹیلی کام سیکٹر نان فائلرز کے ٹیکس کے معاملے کا فریق نہیں ہے۔
یہ بھی لکھا گیا تھا کہ 500 ڈالر مالیت تک موبائل فون سیٹ پر سیلز ٹیکس کی شرح بڑھنے سے کم آمدن طبقے کی شمولیت کو نقصان ہوگا۔
خط میں ٹیلی کام آپریٹرز نے اپنے تحفظات پیش کرنے کیلیے چیئرمین کمیٹی سلیم مانڈوی والا سے وقت مانگا تھا۔
