اسلام آباد : قومی احتساب بیورو (نیب ) نے سابق صدر آصف زرداری کی گرفتاری کی وجوہات جاری کردیں، جس میں بتایا گیا آصف زرداری نےفرنٹ مین اور بےنامی داروں کےذریعے منی لانڈرنگ کی اور جعلی اکاونٹس کے ذریعے فائدے لیے۔
تفصیلات کے مطابق قومی احتساب بیورو (نیب ) کی جانب سے آصف علی زرداری کی گرفتاری کی وجوہات سامنے آگئیں ، جس میں بتایا گیا بےنامی دار اورفرنٹ مین کےذریعے منی لانڈرنگ کے منصوبےکا الزام ہے اور حاصل کی گئی رقم کو وائٹ کرنے کیلئے جعلی اکاؤنٹس کھلوائے گئے ، اکاؤنٹس بینک افسروں کی معاونت سے کھلوائےگئے ۔
نیب کا کہنا ہے اکاؤنٹس اے ون انٹرنیشنل ،لکی انٹرنیشنل،لاجسٹک ٹریڈنگ دیکھتےتھے اور رائل انٹرنیشنل اورعمیر ایسوسی ایٹس بھی اکاؤنٹس کنٹرول کرتے تھے، بےنامی دارملازمین اوردیگر نےکمیشن ،کک بیکس بینک میں جمع کرائیں۔
نیب کے مطابق 1.7 ارب کے 67فیصدشیئرخریدےگئے، شیئرز کی کل قیمت 14.6ارب ہے ، کمپنی کے ذریعےبھی منی لانڈرنگ کی گئی ،معاملات انورمجیددیکھ رہاتھا۔
نیب نے بتایا اومنی گروپ،آصف زرداری اورجعلی اکاونٹس میں روابط کےلیےبنایاگیا، مقصد آصف علی زرداری کوجعلی اکاؤنٹس کےلنک سے دور رکھنا تھا، آصف زرداری نےجعلی اکاونٹس کےذریعے فائدے لیے، جعلی اکاؤنٹس میں ٹرانزیکشن کرکےغیرقانونی آمدن کوجائز کرنےکامنصوبہ بنایا۔
آصف زرداری نےفرنٹ مین اوربےنامی داروں کےذریعے منی لانڈرنگ کی، فرنٹ مین منصوبوں سےرشوت لے کر جعلی اکاؤنٹس میں جمع کراتے جبکہ آصف زرداری نے اے جی مجید کےذریعے 14 ارب کےشئیرخریدے۔
مزید پڑھیں : جعلی اکاؤنٹس کیس ، نیب نے سابق صدر آصف زرداری کو گرفتار کرلیا
قومی احتساب بیورو کے مطابق آصف زرداری نےاپنےاور جعلی اکاونٹس کے درمیان اومنی گروپ کا سہارا لیا، نجی بینک کےصدر نےبھی منی لانڈرنگ میں مدد کی ، 4.4 ارب کی رقم اے ون انٹرنیشنل کے جعلی اکاؤنٹ میں جمع کرائی گئی اور 2.8ارب سے شیئرز خریدے گئے جبکہ بچوں کے نام پررقوم اے ون انٹرنیشنل کے جعلی اکاونٹ سے بھیجی گئی۔
یاد رہے جعلی بینک اکاؤنٹس کیس میں اسلام آباد ہائی کورٹ نے سابق صدر آصف زرداری اور فریال تالپور کی درخواست ضمانت مسترد کردی تھی اور گرفتار کرنے کا حکم دیا تھا، جس کے بعد نیب ٹیم نے سابق صدر آصف زرداری کو بلاول ہاؤس سے گرفتار کرلیا تھا۔
خیال رہے نیب نے میگا منی لانڈرنگ کیس میں آصف رزداری کے وارنٹ گرفتاری جاری کر رکھے ہیں، کیس میں آصف زرداری،فریال تالپورکی عبوری ضمانت میں 6 بار توسیع کی جا چکی تھی۔
آصف زرداری اور فریال تالپور پر جعلی اکاؤنٹس سے منی لانڈرنگ کاالزام ہے جبکہ جعلی اکاؤنٹس کا مقدمہ احتساب عدالت میں زیر التوا ہے۔
