اسلام آباد: وفاقی وزیر اطلاعات فواد چوہدری نے سابق فاسٹ بولر شعیب اختر اور سرکاری ٹی وی کے اینکر پرسن نعمان نیاز کے مابین اپنے گھر پر صلح کرائی تو اس کے بعد انھوں نے ایک سیلفی بھی لی۔
سرکاری ٹی وی پر ٹی ٹوئنٹی ورلڈ کپ کے پاک نیوزی لینڈ میچ کے سلسلے میں گفتگو کے دوران نعمان نیاز نے شعیب اختر سے بدتمیزی کی تھی، اور اچانک انھیں پروگرام سے چلے جانے کا کہا، جس پر شعیب اختر نے شو چھوڑ دیا۔
بعد ازاں، شعیب اختر کے مداحوں اور پاکستانی عوام کی جانب سے سوشل میڈیا پر جو ردِ عمل سامنے آیا، اس نے نعمان نیاز کو مشکل میں ڈال دیا، دوسری طرف شعیب کے لیے مداحوں کے دلوں میں موجود پیار بھی سب نے دیکھا۔
نعمان نیاز اور شعیب اختر میں صلح ہو گئی
اگرچہ اس کے بعد نعمان نیاز نے اے آر وائی نیوز کے ایک پروگرام میں شعیب اختر سے ہاتھ جوڑ کر معافی بھی مانگی، لیکن دونوں کے درمیان معاملات بگڑ چکے تھے، جس پر فواد چوہدری نے میدان میں آ کر اپنا کردار نبھایا۔
دوست دو چار نکلتے ہیں کہیں لاکھوں میں
جتنے ہوتے ہیں سوا اتنے ہی کم ہوتے ہیں۔۔۔۔۔۔۔۔ بات اتنی نہیں تھی کہ اس پر اتنی گفتگو ہوتی لیکن کیا ہے کہ سوشل میڈیا اب اتنا بڑا ہے کہ چھوٹی باتیں بھی بڑی ہو جاتی ہیں، بہرحال All is well that ends well #GameOnHai #PTV pic.twitter.com/TLsGjfUw13
— Ch Fawad Hussain (@fawadchaudhry) November 13, 2021
آج وزیر اطلاعات کے گھر پر شعیب اختر اور نعمان نیاز کے درمیان صلح ہو گئی، صلح کے بعد اس واقعے کو یادگار بنانے کے لیے گھر سے باہر آ کر فواد چوہدری نے ایک سیلفی بھی لی۔
سیلفی میں فواد چوہدری تو خوش نظر آ رہے ہیں تاہم شعیب اختر کے چہرے پر کچھ خاص خوشی یا اطمینان کا تاثر نہیں دکھائی دیتا، جب کہ نعمان نیاز مطمئن نظر آتے ہیں۔
اپنے ٹوئٹر اکاؤنٹ پر سیلفی شیئر کرتے ہوئے فواد چوہدری نے پیغام کے ساتھ ایک شعر بھی لکھا:
دوست دو چار نکلتے ہیں کہیں لاکھوں میں
جتنے ہوتے ہیں سِوا، اتنے ہی کم ہوتے ہیں
فواد چوہدری نے لکھا کہ بات اتنی نہیں تھی کہ اس پر اتنی گفتگو ہوتی، لیکن کیا ہے کہ، سوشل میڈیا اب اتنا بڑا ہے کہ چھوٹی باتیں بھی بڑی ہو جاتی ہیں۔
