کینیڈا میں رواں ماہ 28 اپریل کو عام انتخابات ہو رہے ہیں ان الیکشن میں پہلی بار ریکارڈ تعداد میں پاکستانی نژاد امیدوار بھی میدان میں ہیں۔
غیر ملکی خبر رساں ادارے کے مطابق کینیڈا میں رواں ماہ 28 اپریل کو وفاقی انتخابات ہونے جا رہے ہیں جس میں سینکڑوں مقامی سیاستدانوں کے ساتھ پہلی بار ریکارڈ تعداد میں پاکستانی نژاد امیدوار بھی الیکشن کے میدان میں اتر رہے ہیں۔
رپورٹ کے مطابق 50 پاکستانی نژاد امیدوار 28 اپریل کو کینیڈا کی سیاسی ایوان میں انٹری کے لیے اپنی قسمت آزمائی کریں گے اور وہ مختلف سیاسی جماعتوں کے پلیٹ فارمز سے الیکشن لڑ رہے ہیں۔
سب سے زیادہ 15 پاکستانی نژاد امیدوار لبرل پارٹی آف کینیڈا کی جانب سے امیدوار ہیں۔ ان میں سے 5 امیدوار سلمیٰ زاہد، اقراء خالد، شفقت علی، یاسر نقوی اور سمیر زبیری ارکانِ پارلیمنٹ رہ چکے ہیں اور اس بار بھی ان کی کامیابی کے روشن امکانات ہیں۔
لبرل پارٹی کے پلیٹ فارم سے الیکشن لڑنے والے دیگر پاکستانی نژاد امیدواروں میں اسلم رانا، مبارک احمد، حفیظ ملک، ذیشان خان، شہناز منیر، غضنفر تارڑ، ایاز بنگش، عزیز میاں، گل خان اور نجم نقوی شامل ہیں۔
نیو ڈیموکریٹک پارٹی سے 10 پاکستانی نژاد امیدوار الیکشن کا حصہ ہیں۔ ان میں خاور حسین، محمد ریاض ساہی، آفتاب قریشی، سمیر قریشی، احمد خان، روبی زمان، نوید احمد، ضیغم جاوید ودیگر شامل ہیں۔
گرین پارٹی آف کینیڈٓ سے تین پاکستانی نژاد امیدوار الیکشن کے میدان میں ہیں۔ ان میں طالبہ افرا بیگ بھی شامل ہیں۔
کینیڈا میں سنٹرسٹ پارٹی کے نام ایک سیاسی جماعت رجسٹرڈ ہے جس کے بیشتر امیدواروں کا تعلق پاکستانی کمیونٹی سے ہے۔ اس سیاسی جماعت کے سربراہ بھی پاکستانی نژاد ہیں اور ان کی صاحبزادی زینب رانا کینیڈا کے تمام امیدواروں میں کم عمر ترین اور گریڈ 12 کی طالبہ ہیں۔
کمیونسٹ پارٹی آف کینیڈا سے سلمان ظفر اور پیپلز پارٹی آف کینیڈا نے نجیب بٹ کو انتخابی اکھاڑے میں اتارا ہے۔ ان کے علاوہ مزید پانچ پاکستانی نژاد آزاد امیدوار کی حیثیت سے الیکشن لڑیں گے۔
