اسلام آباد : رواں سال ملک میں کینو کی ریکارڈ پیداوار کے پیش نظر وزارت تجارت نے برآمد کنندگان کو خوشخبری سنادی جس کا بڑا فائدہ ملکی معیشت کو بھی ملے گا۔
تفصیلات کے مطابق وزارت صنعت و تجارت نے رواں سال ملک بھر میں کینو کی بمپر پیداوار کے امکان کے پیش نظر ایکسپورٹرز کینو برآمد کرنے کی اجازت دے دی۔
اس حوالے سے ذرائع کا کہنا ہے کہ رواں سال کینو کی 27 لاکھ ٹن کی بمپر پیداوار کا امکان ہے، یاد رہے کہ گزشتہ سال کینو کی پیداوار محض 13 لاکھ ٹن تک محدود رہی۔
ذرائع کے مطابق وزارت تجارت نے15 نومبر سے ہی کینو برآمد کرنے کی اجازت دے دی ہے، مذکورہ فیصلہ وزارت تجارت کی جانب سے قائم کمیٹی کی تجویز کی روشنی میں کیا گیا۔
دوسری جانب مارکیٹ ذرائع کا کہنا ہے کہ ایکسپورٹرز کرسمس سیزن سے پہلے ہی کینو کی کنسائنمنٹ بھیجنا چاہتے ہیں یاد رہے کہ وزارت تجارت ماضی میں یکم دسمبر کو کینو برآمد کرنے کی اجازت دیا کرتی تھی۔
واضح رہے کہ جدید پیداواری ٹیکنالوجی سے استفادہ نہ کرنے اور مخصوص موسمی حالات کے ساتھ ساتھ گریڈنگ، پالشنگ، پیکنگ وغیرہ کی مناسب سہولیات کے فقدان کے باعث پاکستان میں کینو کی پیداوار میں بتدریج کمی واقع ہونے لگی تھی تاہم رواں سال پیداوار میں نمایاں اضافے کا امکان ہے۔
