لاڑکانہ: وزیر داخلہ سندھ ضیا النجار نے سندھ پولیس میں بھرتی کے خواہشمند افراد کو خوشخبری سنادی۔

اے آر وائی نیوز کے مطابق وزیر داخلہ سندھ ضیا النجار کا کہنا ہے کہ سندھ پولیس میں 50 ہزار نئے اہلکار بھرتی کرنے جارہے ہیں، لاڑکانہ میں ون فائیو کی جگہ ذوالفقار فورس بنائی جارہی ہے جنہیں 50 موٹر سائیکلیں بھی دے رہے ہیں۔

انہوں نے کہا کہ کراچی میں اسٹریٹ کرائم میں واضح کمی آئی ہے، بالائی سندھ کے حوالے سے احکامات دے چکا ہوں جلد تبدیلی نظر آئے گی۔

ضیا النجار نے کہا کہ شکارپور سے کندھ کوٹ اور سی پیک روڈ گھوٹکی پر دن رات ٹریفک کی روانی جاری ہے۔

وزیر داخلہ نے کہا کہ لاڑکانہ آنے کا مقصد امن و امان کی صورتحال کا جائزہ لینا تھا، ایس ایس پیز کو کہہ دیا ہے ان کے معاملات میں سیاسی مداخلت نہیں ہوگی جن کے پاس غیرضروری پولیس اہلکار ہیں وہ واپس لیے جائیں گے۔

انہوں نے کہا کہ کچے کے اضلاع کو مزید فنڈز فراہمی کا پلان ہے، ڈاکوؤں کو مارا جائے، گرفتار کیا جائے تو وہ بھی تخریبی کارروائیاں تیز کرتے ہیں۔

وزیر داخلہ نے مزید کہا کہ ہم کچے کے ڈاکوؤں سے گھبرانے والے نہیں، ایک ماہ میں ہائی وے پولیس کو شروع کریں گے۔