بیجنگ: چین میں ایک سرخ پانڈا چڑیا گھر سے بھاگنے کے 8 ماہ بعد واپس لوٹ آیا۔ یہ پانڈا گزشتہ برس سردیوں میں برفباری کے دنوں میں چڑیا گھر سے بھاگا تھا۔
سرخ پانڈا، پانڈا کی ایک نایاب نسل ہے جو مغربی چین کے علاقوں میں پایا جاتا ہے۔ عالمی ادارہ برائے تحفظ فطرت آئی یو سی این کے مطابق اس جاندار کو اپنی پناہ گاہوں یا رہائشی مقامات میں کمی کے باعث بقا کا خطرہ لاحق ہے۔ دنیا بھر میں اس پانڈا کی تعداد صرف 10 ہزار ہے۔
چین میں چڑیا گھر سے فرار ہونے والے پانڈا کی تعداد 3 تھی۔ گذشتہ برس برف باری کے دوران برف کے بوجھ سے ان کے پنجرے ٹوٹ گئے تھے جس کا انہوں نے بھرپور فائدہ اٹھایا اور چڑیا گھر سے بھاگ نکلے۔
بھاگنے والے 2 پانڈا کچھ عرصہ بعد واپس آگئے تاہم تیسرا پانڈا لمبی ’تعطیلات‘ کے لیے نکل گیا لیکن بالآخر 8 ماہ بعد واپس لوٹ آیا۔
چڑیا گھر کی انتظامیہ نے اس پانڈا کو چڑیا گھر کے قریب ایک درخت پر دیکھا جس کے بعد انہوں نے اسے وہاں سے نکالنے کے لیے بے ہوش کرنے والی گن کا استعمال کیا اور درخت کے نیچے جال لگادیے۔
بعد ازاں پانڈا کو اس کے پنجرے میں منتقل کردیا گیا اور اس کی دیکھ بھال شروع ہوگئی۔
واضح رہے کہ سرخ پانڈا کو پناہ گاہوں کی کمی کے علاوہ شکار کے باعث بھی بقا کا خطرہ ہے۔ اسے سرخ بھالو بلی بھی کہا جاتا ہے اور اس کی خوراک میں بانس کے علاوہ انڈے، پرندے اور کیڑے مکوڑے بھی شامل ہیں۔
