اسلام آباد : رجسٹرار اسلام آباد ہائی کورٹ نے پی ٹی آئی چیئرمین عمران خان کی کل 2 مقدمات میں ممکنہ پیشی کے موقع پر سیکیورٹی انتظامات کی ہدایت کردی۔
تفصیلات کے مطابق محسن شاہنواز رانجھا پر حملہ اور اداروں کیخلاف بیان پر مقدمات میں عبوری ضمانت کے لئے پی ٹی آئی چیئرمین عمران خان کی کل 9 مئی کو اسلام آباد ہائی کورٹ میں ممکنہ پیشی کا امکان ہے۔
چیف جسٹس عامر فاروق اور جسٹس گل حسن اورنگزیب کل کیس کی سماعت کریں گے، عمران خان کی پیشی کے موقع پر رجسٹرار اسلام آباد ہائی کورٹ کا سرکلر جاری کردیا ہے۔
اسلام آباد ہائی کورٹ کا آئی جی اور ضلع انتظامیہ کو سیکورٹی انتظامات کی ہدایت کردی ہے ، عمران خان کی 2 مقدمات میں عبوری درخواست ضمانت پرسماعت کل ڈھائی بجے ہوگی۔
سرکلر میں کہا گیا ہے کہ کورٹ روم نمبر 1 میں وکلااور صحافیوں کا داخلہ خصوصی پاس کےذریعے ہوگا تاہم اسلام آباد ہائی کورٹ کے ملازمین اور عدالتی عملہ خصوصی پاس سے مستثنیٰ ہوں گے۔
رجسٹرار کا کہنا ہے کہ عمران خان کے ساتھ 15وکلاکو کمرہ عدالت جانے کی اجازت ہوگی جبکہ اٹارنی جنرل ،ایڈووکیٹ جنرل آفس سے 10 وکلاکمرہ عدالت جاسکیں گے اور اسلام آباد ہائیکورٹ جرنلسٹس ایسوسی ایشن کے 30ممبران کو کمرہ عدالت جانے کی اجازت ہوگی۔
سرکلر میں کمرہ عدالت میں داخلے کیلئےخصوصی پاس ،8 مئی تک فہرستیں فراہم کرنے ، انتظامیہ کوخصوصی پاس ،ڈیپارٹمنٹ کارڈ ہولڈر کو احاطہ عدالت سےنہ روکنے کی ہدایت کردی گئی ہے۔
رجسٹرار نے کہا ہے کہ خصوصی پاسز رکھنے والے افراد کوکمرہ عدالت نمبر ایک میں جانے کی اجازت ہوگی۔
