ریاض : مسجد الحرام اور مسجد نبوی ﷺ میں اعتکاف کی تیاریاں شروع کردی گئیں، خواہشمند افراد کیلیے رجسٹریشن کا آغاز جلد کیا جائے گا۔
اس حوالے سے سعودی حکام کا کہنا ہے کہ مسجد الحرام اور مسجد نبوی ﷺ میں اعتکاف کیلئے رجسٹریشن کا آغاز 5 مارچ سے ہوگا۔
دی اسلامک انفارمیشن نامی ویب سائٹ کی رپورٹ کے مطابق دونوں مقدس مساجد کی جنرل اتھارٹی نے رمضان المبارک 2025 کے دوران اعتکاف کے لیے رجسٹریشن کھولنے کا اعلان کردیا ہے۔
معتکفین کی رجسٹریشن اس وقت تک جاری رہے گی جب تک مساجد میں اعتکاف کے لیے مختص جگہوں کو پُر نہیں کیا جاتا۔
انتظامیہ کے مطابق ماہ صیام 2025 میں دونوں مقدس مساجد میں اعتکاف کی سعادت حاصل کرنے والے خواہشمند حضرات 5 مارچ کو دن 11 بجے سے اتھارٹی پورٹل پرکوائف رجسٹر کراسکتے ہیں۔
درخواست دہندگان کو کچھ ضروریات کو پورا کرنا ہوگا، انہیں ان مساجد میں قواعد و ضوابط کی پابندی کے لیے یقین دہانی کروانا ہوگی۔
جنرل اتھارٹی نے اعتکاف رجسٹریشن کے لیے استعمال ہونے والی وزیٹر ایپ کو اپ ڈیٹ کر دیا ہے جس کے تحت ابھی صرف سعودی شہریوں اور اقامہ ہولڈرز کو رسائی دی گئی ہے۔
اس کا مطلب یہ ہوا کہ بین الاقوامی زائرین اور عازمین حج سعودی رہائشی اجازت نامے (اقامہ) کے بغیر اب ان دونوں مقدس مساجد میں اعتکاف کے لیے اندراج نہیں کراسکیں گے۔ انتظامیہ کے مطابق حرمین شریفین میں ہر معتکف کو خصوصی کارڈ اور لاکر فراہم کیا جائے گا۔
