انگلینڈ کرکٹ ٹیم کے ایک اور اسپنر ریحان احمد کے ویزا پر تنازع کھڑا ہوگیا اور انہیں راجکوٹ ایئرپورٹ پر روک لیا گیا ہے۔
بھارتی میڈیا رپورٹ کے مطابق انگلش کرکٹر ریحان احمد کو راجکوٹ ایئرپورٹ پر کاغذات مکمل نہ ہونے پر روکا گیا ہے، ان کے پاس سنگل انٹری ویزا تھا۔
مقامی انتظامیہ کی مداخلت سے دو روز کا ویزا جاری ہوا، انگلینڈ ٹیم انتظامیہ کو دو روز کے اندر معاملے کو حل کرنے کا کہا گیا ہے۔
دوسری جانب بھارتی کرکٹ بورڈ آفیشلز کا کہنا ہے کہ انگلینڈ کو دوبارہ ویزا پراسیس کرانے کا کہا ہے۔
واضح رہے کہ اس سے قبل انگلش آل راؤنڈر شعیب بشیر نے ویزا مسائل پر تاخیر سے انگلینڈ ٹیم کو جوائن کای تھا جبکہ ریحان احمد کو پہلی مرتبہ بھارت آمد پر کسی مسئلے کا سامنا نہیں رہا تھا۔
واضح رہے کہ انگلینڈ کرکٹ ٹیم ابوظبی میں دس روز کی بریک کے بعد دوبارہ بھارت آرہی تھی جس وقت ریحان احمد کو روک لیا گیا۔
بھارت اور انگلینڈ کے درمیان تیسرا ٹیسٹ میچ جمعرات سے راجکوٹ میں کھیلا جائے گا۔ دونوں ٹیموں کے درمیان ٹیسٹ سیریز 1-1 سے برابر ہے۔
