کراچی : ریڑھی گوٹھ میں اے آر وائی نیوز کی رپورٹ پر پولیس نے بڑا ایکشن لے لیا، منشیات کے گندے دھندے میں ملوث چار خواتین سمیت گیارہ ملزمان دھرلیے گئے۔
تفصیلات کے مطابق کراچی کے علاقے ریڑھی گوٹھ میں پولیس نے کامیاب کارروائی کرتے ہوئے منشیات فروشی میں ملوث11 ملزمان کو گرفتار کرلیا، ملزمان میں چار خواتین بھی شامل ہیں۔
پولیس نے مذکورہ کارروائی اے آروائی نیوز کی خبر پر عمل میں لائی، کارروائی کے بعد اپنی رگوں میں نشے کا زہر گھولنے والے کئی افراد کو پکڑ کر بحال مرکز بھیج دیا گیا، نفری تعینات کرکے پولیس نے علاقے کی کڑی نگرانی شروع کر دی ہے۔
ٹارگٹڈ آپریشن سے پہلے سادہ لباس اہلکاروں کو علاقے میں بھیجا گیا، چھاپے کے وقت منشیات فروشوں کے سہولت کاروں کی بڑی تعداد جمع ہوگئی، پولیس نے گھروں میں پناہ لینے والے منشیات فروشوں کو گرفتار کرلیا۔
مزید پڑھیں: کراچی پولیس کی سرپرستی میں ریڑھی گوٹھ منشیات فروشوں کا گڑھ بن گیا
چار خواتین سمیت11 منشیات بیچنے والے پکڑے گئے، کارروائی کے دوران 15 کلو چرس، ہیروئن کے300 سے زائد ٹوکن اور دیگر منشیات برآمد کی گئی۔
