اسلام آباد : وزارت خزانہ کے سابق اقتصادی مشیر اور سابق ڈی جی ڈیبٹ آفس ڈاکٹر اشفاق حسن خان نے کہا ہے کہ اعلانات تو ہوگئے لیکن رقم ملنے میں2سے3سال لگیں گے۔
یہ بات انہوں نے اے آر وائی نیوز کے پروگرام دی رپورٹرز میں خصوصی گفتگو کرتے ہوئے کہی، انہوں نے کہا کہ اشیاء خورد ونوش بہت زیادہ مہنگی ہونے سے غریب عوام شدید پریشان ہیں۔
ڈاکٹر اشفاق حسن نے کہا کہ مہنگائی سے مڈل کلاس بھی شدید متاثر ہے، ہم اب مہنگائی پلس میں چلے گئے ہیں، آنے والے دن مزید سخت ہوسکتے ہیں۔
جنیوا کانفرنس کے حوالے سے ان کا کہنا تھا کہ ماضی قریب میں آنے والے زلزلے میں بھی عالمی برادری کی جانب سے متعدد اعلانات کیے گئے تھے، صرف اعلانات ہونا الگ اور پیسے مل جانا دوسری چیز ہے۔
ان کا کہنا تھا کہ اعلانات ہوگئے ہیں اس کامطلب یہ نہیں کہ کل ہی رقم مل جائےگی یہ رقم ملنے میں2سے3سال لگیں گے، اے ڈی بی ہرسال پاکستان کیلئے اعلانات کرتا ہے لیکن رقم دینے میں وقت لگتا ہے۔
ایک سوال کے جواب میں انہوں نے کہا کہ وزیر خزانہ اسحاق ڈار نے جو کمرشل بینکوں کی بات کی وہ انتہائی غیرذمہ دارانہ بیان تھا، اس بات سے مارکیٹ میں خوف پیدا ہوگیا ہے، لوگ اب اپنے ڈالرز نکالنے کی کوشش کریں گے انہیں ایسا بیان نہیں دینا چاہیے تھا۔
ایک کتاب میں لکھا تھا کہ جب حکومت اشتہارات کا سہارا لینے لگے تو سمجھو اس نے کچھ نہیں کیا، کیونکہ جب آپ نے کوئی اچھا کام کیا ہوتا تو اشتہارات کی ضرورت نہ ہوتی، اچھا کام کیا ہو تو عوام کو خود ہی نظر آجاتا ہے۔
بغیر الیکشن کے کسی کے پاس کوئی حل ہے تو اچھی بات ہے، حکومت کی مدت بڑھادیں گے تو کیا اس سے معیشت بہتر ہوجائے گی؟ آج معیشت جہاں کھڑی ہے مدت بڑھائی تو مزید نقصان ہوگا۔
