اسلام آباد: رجسٹرار سپریم کورٹ نے مخصوص نشستوں کے معاملے پر اکثریتی ججز کی وضاحت کے حوالے سے رپورٹ چیف جسٹس پاکستان قاضی فائز عیسیٰ کو ارسال کر دی۔
ذرائع نے اے آر وائی نیوز کو بتایا کہ چیف جسٹس قاضی فائز عیسیٰ نے 8 اکثریتی ججز کی وضاحت پر رجسٹرار جزیلہ سلیم کو خط لکھ کر سوالات کے جوابات طلب کیے تھے جس پر اب انہیں رپورٹ ارسال کی گئی ہے۔
رپورٹ میں رجسٹرار نے بتایا کہ وضاحتی حکمنامے کے معاملے پر کوئی کاز لسٹ جاری نہیں ہوئی جبکہ درخواستوں کیلیے فریقین کو نوٹس بھی نہیں بھیجے گئے۔
اس میں مزید بتایا گیا کہ درخواست کے سلسلے میں کسی چیمبر میں ججز نہیں بیٹھے، فیصلہ ویب سائٹ پر اپلوڈ کرنے سے قبل فائل آفس کو نہیں بھیجی گئی۔
یاد رہے کہ چیف جسٹس قاضی فائر عیسیٰ نے رجسٹرار جزیلہ سلیم کو لکھے گئے خط میں کہا تھا کہ الیکشن کمیشن اور پاکستان تحریک انصاف (پی ٹی آئی) نے وضاحت کی درخواست کب دائر کی؟ پی ٹی آئی اور الیکشن کمیشن کی درخواستیں پریکٹس اینڈ پروسیجر کمیٹی میں کیوں نہیں بھیجی گئیں؟
قاضی فائز عیسیٰ نے سوال کیا تھا کہ متفرق درخواستیں کاز لسٹ کے بغیر کیسے سماعت کیلیے فکس ہوئیں؟ کیا رجسٹرار آفس نے متعلقہ فریقین اور اٹارنی جنرل کو نوٹس جاری کیا؟ کس کمرہ عدالت یا چیمبر میں درخواستوں کو سنا گیا؟
خط میں چیف جسٹس سے سوال کیا تھا کہ درخواستوں پر فیصلہ سنانے کیلیے کاز لسٹ کیوں جاری نہیں کی گئی؟ آرڈر کو سنانے کیلیے کمرہ عدالت فکس کیوں نہ کیا گیا؟ اوریجنل فائل اور آرڈر سپریم کورٹ رجسٹرار میں جمع ہوئے بغیر آرڈر کیسے اپلوڈ ہوا؟ آرڈر کو سپریم کورٹ ویب سائٹس پر اپلوڈ کرنے کا حکم کس نے کیا؟
اکثریتی ججز کی وضاحت
14 ستمبر کو مخصوص نشستوں کے کیس میں اکثریتی فیصلہ دینے والے 8 ججز نے وضاحت جاری کی تھی کہ الیکشن کمیشن کی وضاحت کی درخواست تاخیری حربہ ہے، الیکشن کمیشن کی درخواست عدالتی فیصلے پر عملدرآمد کے راستے میں رکاوٹ ہے۔
وضاحت میں کہا گیا تھا کہ الیکشن کمیشن کی وضاحت کی درخواست درست نہیں، الیکشن کمیشن نے خود بیرسٹر گوہر کو پارٹی چیئرمین تسلیم کیا تھا، الیکشن کمیشن وضاحت کے نام پر اپنی پوزیشن تبدیل نہیں کر سکتا۔
ججز نے وضاحت میں کہا تھا کہ الیکشن کمیشن کی تسلیم شدہ پوزیشن ہے پی ٹی آئی رجسٹرڈ سیاسی جماعت ہے، اقلیتی ججز نے بھی پی ٹی آئی کی قانونی پوزیشن کو تسلییم کیا۔
اس میں مزید کہا گیا تھا کہ سرٹیفکیٹ جمع کرانے والے پی ٹی آئی کے ارکان ہیں، عدالتی فیصلے پر عمل کے تاخیر کے نتائج ہوسکتے ہیں، سرٹیفکیٹ جمع کرانے والے پی ٹی آئی کے ارکان ہیں، الیکشن کمیشن نے 41 ارکان سے متعلق وضاحت کیلیے سپریم کورٹ سے رجوع کیا تھا۔
وضاحت میں کہا گیا تھا کہ الیکشن کمیشن کی درخواست کنفیوژن پیدا کرنے کی کوشش ہے۔
