واشنگٹن : امریکی صدر ڈونلڈ ٹرمپ کو نااہل قرار دینے کے لیے ایوان میں قرارداد پیش کردی گئی، مواخذے کی قرارداد ڈیموکریٹس نے پیش کی۔
غیر ملکی خبر رساں ادارے کے مطابق امریکی ایوان نمائندگان میں صدر ڈونلڈ ٹرمپ کے مواخذے کی قرارداد پیش کردی گئی، مذکورہ قرارداد ڈیموکریٹس نے پیش کی ہے۔
قرارداد میں نائب صدر مائیک پینس سے ٹرمپ کو ہٹانے کا مطالبہ کیا گیا ہے، قرار داد کے متن میں کہا گیا ہے کہ ٹرمپ نے اپنے حامیوں کو کیپیٹل ہل حملے پراکسایا۔
قرارداد میں مزید کہا گیا ہے کہ کیپیٹل ہل حملے میں 5افراد اپنی جانوں سے گئے، صدر ٹرمپ فوری طور پر اپنے عہدے سے مستعفی ہوں ورنہ ان کا مواخذہ کیا جائے۔
ا س سے قبل ایوان نمائندگان کی اسپیکر نینسی پلوسی کی جانب سے جاری کیے گئے ایک خط کے مطابق مائیک پینس سے اپیل کی گئی ہے کہ وہ امریکی آئین کی 25 ویں ترمیم کا اطلاق کریں۔
واضح رہے کہ واشنگٹن میں کیپیٹل ہل پر اپنے حامیوں کی جانب سے دھاوا بولنے کے بعد صدر ٹرمپ پر مستعفی ہونے کا دباؤ بڑھ گیا ہے، ایوانِ نمائندگان میں صدر ٹرمپ کے خلاف اگر مواخذے کی قرارداد منظور ہو جاتی ہے تو ایسا ان کے ساتھ دوسری مرتبہ ہوگا۔
اس سے قبل صدر ٹرمپ کے خلاف دسمبر 2019 میں اختیارات کے ناجائز استعمال اور کانگریس کی تحقیقات میں رکاوٹ ڈالنے کے الزامات کے تحت ایوانِ نمائندگان نے ان کا مواخذہ کیا تھا البتہ سینیٹ میں ٹرائل کے بعد فروری 2020 میں ری پبلکن اکثریتی سینیٹ نے صدر کو ان الزامات سے بری کر دیا تھا۔
