اسلام آباد : یورو ایشین کانفرنس میں پاکستان کی جانب سے مسئلہ کشمیر پر قرار داد پیش کرنےپربھارتی وفد سیخ پا ہوگیا ، سلیم مانڈوی والا کا کہنا ہے کہ کانفرنس کے شرکا کشمیر،فلسطین ، میانمار میں مظالم کا نوٹس لیں۔
تفصیلات کے مطابق یورو ایشین کانفرنس میں بھارت کی روڑے اٹکانے کی کوشش ناکام ہوگئی ، ڈپٹی چیئرمین سینیٹ سلیم مانڈوی والا کی تقریرکےدوران بھارتی وفد نے ہلڑبازی کی اور مسئلہ کشمیر پر قرارداد پیش کرنے پر بھارتی وفد سیخ پا ہوگیا۔
مقبوضہ کشمیرمظالم اجاگرکرنے پر بھارتی وفد نے تقریر روکنے کی کوشش کی ، سینیٹر سلیم مانڈوی والا نے کشمیر میں بھارتی مظالم کیخلاف قرارداد پیش کر دی۔
سلیم مانڈوی والا نے کہا یورو ایشین کانفرنس کے شرکا نے بھارتی مظالم کی بھر پور مذمت کی،ظلم اور جبر کے ذریعے انسانوں کی مرضی کو دبایا نہیں جاسکتا، انسانی حقوق کی خلاف ورزیاں اقوام متحدہ چارٹر کے خلاف ہیں۔
ڈپٹی چیئرمین سینیٹ نے مطالبہ کیا کانفرنس کے شرکا کشمیر، فلسطین ، میانمارمیں مظالم کانوٹس لیں ، کشمیر سمیت ہر جگہ طاقت کے استعمال کو مسترد کرتے ہیں، خود مختاری کشمیریوں کا جمہوری حق ہے جس کی حمایت کرتے ہیں۔
ان کا کہنا تھا کہ غیر جمہوری قوتیں عوام کو ڈرا دھمکا کرمذاکرات کا راستہ بند کررہی ہیں، کشمیر اقوام متحدہ کا نامکمل ایجنڈا ہے، مسئلہ کشمیر بین الاقوامی برادری کے لیے ٹیسٹ کیس ہے۔
سلیم مانڈوی والا نے مزید کہا کہ مقبوضہ کشمیر پر آواز اٹھانے والے ممالک کے شکر گزار ہیں، ترکی، ایران، یواے ای و دیگر ممالک نے کشمیرمیں مظالم کی مذمت کی، بین الاقوامی تنظیموں نے بھی بھارتی مظالم کیخلاف آواز بلند کی۔
