لندن: امیر ترین برطانوی شہری لاک ڈاؤن پامال کرنے میں مصروف، پرائیوٹ طیاروں کے ذریعے وائرس سے متاثرہ علاقوں سے لوگوں کو برطانیہ لانے کا عمل جاری ہے۔
برطانوی حکومت نے تئیس مارچ کو لاک ڈاؤن کا اعلان کیا اور لاک ڈاؤن قوانین بھی متعارف کرائے جن کی بنیاد پر سیکڑوں لوگوں کو غیر ضروری نقل و حرکت پر جرمانے کئے گئے تاہم لاک ڈاؤن شروع ہونے سے اب تک 545 پرائیویٹ طیارے برطانوی فضائی حدود میں داخل ہوے جن میں سے 25 وائرس سے بری طرح متاثر اسپین اور امریکہ سے آئے، روزانہ ہزاروں افراد برطانوی حدود میں داخل ہو رہے ہیں جن کے ٹیسٹ کا سکریننگ کا کوئی انتظام نہیں کیا گیا۔
مقامی میڈیا کے مطابق امیر ترین افراد پرائیوٹ طیاروں کے ذریعے سفر کر رہے ہیں اور ان کی نقل و حرکت “ضروری سفر” میں شمار ہوتی ہے یا نہیں اس حوالے سے صورتحال واضح نہیں۔
برطانوی ائر چارٹر سروس کے چیف ایگزیکٹو کا کہنا ہے کہ پرائیویٹ طیاروں کے ذریعے آنے والے اکثر افراد صرف گھر واپس آنے کیلئے سروس استعمال کر رہے ہیں اور ان میں لاک ڈاؤن کی خلاف ورزی کرنے والوں کی تعداد انتہائی کم ہے۔برطانیہ نے فضائی حدود اور آمد و رفت پر پابندی نہیں لگائی جس پر مختلف حلقوں کی طرف سے تنقید بھی جاری ہے۔
