نئی دہلی: بھارتی کرکٹ کنٹرول بورڈ (بی سی سی آئی) دنیا کا امیر ترین کرکٹ بورڈ بن گیا ہے۔

بھارتی میڈیا کے مطابق بی سی سی آئی نے 19۔2018 میں بھارتی ٹیم کے میڈیا حقوق سے بہت فائدہ اٹھایا تھا، بورڈ نے اب 2020 کی بیلنس شیٹ جاری کر دی ہے۔

دنیا کے امیر ترین کرکٹ بورڈ نے مالی سال 19۔2018 کے دوران صرف کرکٹ ٹیم کے میڈیا حقوق سے 828 کروڑ روپے کمائے، جو آج تک کسی بورڈ کو نہیں دیے گئے۔

بی سی سی آئی کی بیلنس شیٹ کے مطابق انڈین پریمیر لیگ (آئی پی ایل) کے 2018 ایڈیشن کے دوران، بورڈ نے 2،407.46 کروڑ روپے کمائی کی۔

بھارتی بورڈ مالی سال 19۔2018 کے اختتام تک 14،489.80 کروڑ روپے کے ساتھ ایک بڑا کرکٹ بورڈ بن گیا ہے، اور اب اس نے اپنے مالی اثاثوں میں مزید 2،597.19 کروڑ کا اضافہ کر لیا ہے۔

بھارتی بورڈ نے بتدریج ہر سال اپنی مالی حالت مستحکم کی ہے، مالی سال 2014 کے اختتام پر بی سی سی آئی کے مجموعی اثاثوں کی مالیت 5،438.61 کروڑ روپے تھی، 2015 میں مجموعی اثاثے 7،847.07 کروڑ روپے تک پہنچے، 2016 میں 8000 کروڑ روپے، 2017 میں 11،892.61 کروڑ روپے، اور اب یہ اثاثے بڑھ کر 14،889.80 کروڑ روپے ہوگئے ہیں۔

بھارتی ٹیم کے میڈیا حقوق کی فروخت کے سبب بی سی سی آئی کی آمدنی میں گزشتہ برسوں میں کافی اضافہ ہوا، میڈیا کے ان حقوق میں ہوم گراؤنڈز پر کھیلے جانے والے دو طرفہ ٹیسٹ، ون ڈے اور ٹی 20 میچز شامل ہیں۔

بی سی سی آئی کا سرکاری براڈ کاسٹر اسٹار انڈیا بھارت میں کھیلے جانے والے ہر بین الاقوامی میچ کے لیے 43.20 کروڑ کی ادائیگی کرتا ہے، مالی سال 2018 کے دوران بورڈ نے 22 بین الاقوامی میچز کی میزبانی کی، جس میں 7 ٹیسٹ، 10 ون ڈے اور پانچ ٹی 20 میچز شامل تھے۔ اسٹار انڈیا کے پاس آئی پی ایل میں میڈیا کے حقوق بھی ہیں، اس نے 2019 سے 2022 تک آئی پی ایل کے میڈیا حقوق کے لیے 16،347.50 کروڑ روپے کی تاریخی بولی لگائی تھی، جس میں ہر میچ پر تقریباً 54 54.50 کروڑ کی بولی ہے۔