کراچی : شہر قائد میں رکشہ سوار چکر دلانے کے بہانے بچے کو اغوا کرکے فرار ہوگیا ، جس کی سی سی ٹی وی فوٹیج سامنے آگئی۔
تفصیلات کے مطابق کراچی کے علاقے لائنز ایریا سے ڈیڑھ سالہ بچے کو اغوا کرلیا گیا ، پولیس نے بچے کے اغوا کا مقدمہ درج کرلیا۔
مقدمہ اغوا کی دفعات کے تحت بریگیڈ تھانےمیں درج کیاگیا، جس کے متن میں کہا گیا ہے کہ بچےکورکشہ سوار چکر دلانے کے بہانے سے لے کر فرار ہوا۔
واقعہ کی سی سی ٹی وی فوٹیج اے آروائی نیوزنے حاصل کرلی ہے، فوٹیج میں بچے کی بہن کو رکشے کے پیچھے بھاگتے دیکھا جا سکتا ہے۔
والد نے بتایا کہ بچہ اپنی بہن کے ساتھ درخت کے نیچے بیٹھا تھا ، بچی نے بتایا رکشے سوار نے کہا چلو رکشے کاچکر دلاکر لاتا ہوں، جس کے بعد رکشہ سوار نے چکر لگا کر بچی کو اتارا اور بچے کو لیکر فرار ہوگیا۔
والد نے مزید کہا کہ واقعہ کو 5 روز گزر گئے بچے کا سراغ نہیں مل سکا۔
