رکی پونٹنگ نے آسٹریلیا کو خبردار کرتے ہوئے کہا ہے کہ کینگروز ورلڈکپ میں لگاتار دو میچز ہارنے کے متحمل نہیں ہوسکتے۔
جنوبی افریقا اور آسٹریلیا کے خلاف میچ کے حوالے سے اظہار خیال کرتے ہوئے ورلڈکپ فاتح آسٹریلین کپتان کا کہنا تھا کہ اس عالمی کپ میں ہماری ٹیم کو باؤنس بیک کرنا ہوگا۔ پروٹیز سے بھی شکست کھا کر آسٹریلین ٹیم ایونٹ میں 0-2 کی متحمل ہرگز نہیں ہوسکتی۔
رکی پونٹنگ کا کہنا تھا کہ اگر آسٹریلین ٹیم کو چھٹی بار ورلڈکپ ٹرافی اٹھانا ہے تو اسے جلد از جلد باؤنس بیک کرنا پڑے گا اور فتح کے ٹریک پر واپس آنا ہوگا۔
واضح رہے کہ آئی سی سی ورلڈکپ کے اپنے افتتاحی میچ میں آسٹریلیا کو بھارت کے ہاتھوں ہزیمت سے دوچار ہونا پڑا تھا۔ کینگروز میزبان اسپنرز کے آگے بالکل بے بس نظر آئے تھے.
آسٹریلیا نے ابتدا میں تین بھارتی وکٹیں حاصل کی تھیں مگر آٹھویں اوور میں مچل مارش نے ویرات کوہلی کا اہم کیچ ڈراپ کردیا تھا جس کے بعد کینگرو بولرز بھارتی بیٹرز کو قابو کرنے میں ناکام رہے تھے۔
