آپ نے اب تک بہت سے روبوٹس کے بارے میں پڑھا اور سنا ہوگا جن کی جسامت کسی انسان یا کسی جاندار کی صورت میں ڈیزائن کی جاتی ہے۔
آج ہم آپ کو ایسے روبوٹ سے ملواتے ہیں جو شکل سے سینگ والے پہاڑی بکرے کی مماثلت رکھتا ہے اس کے علاوہ وہ بچوں کو اپنی پیٹھ پر بٹھا کر سیر بھی کروا سکتا ہے۔
غیر ملکی خبر رساں ادارے کی رپورٹ کے مطابق جاپان میں کاواساکی کمپنی نے ایک 4 ٹانگوں والا روبوٹ بکرا "بیکس” تیار کیا ہے جس پر بیٹھ کر سفر بھی کیا جاسکتا ہے، اس روبوٹ کو ٹوکیو میں انٹرنیشنل روبوٹ نمائش کے دوران متعارف کرایا گیا۔
یہ روبوٹ کسی بڑی سینگوں والے پہاڑی بکرے جیسا ہے جو یورایشیا اور افریقہ کے مختلف حصوں میں پایا جاتا ہے۔ "بیکس” روبوٹ کاواساکی کمپنی کے کالیڈو پروگرام کا حصہ ہے جس کے تحت 2015 سے بائی پیڈل روبوٹس تیار کیے جارہے ہیں۔
اس پراجیکٹ میں کام کرنے والے انجنیئرز نے ایک ایسا روبوٹ تیار کرنے کا فیصلہ کیا جو سپاٹ سطح اور چٹانی راستوں دونوں جگہ برق رفتاری سے سفر کرسکے۔
اس روبوٹ کے گھٹنوں میں پہیے لگے ہوئے ہیں تاکہ وہ سپاٹ سطح پر تیزی سے حرکت کرسکے جبکہ چٹانی حصوں وہ تیزی سے چلنے کی صلاحیت رکھتا ہے۔
یہ روبوٹ لگ بھگ 100 کلوگرام وزن اٹھا کر چل سکتا ہے جبکہ تعمیراتی سامان اور دیگر کو بھی ایک سے دوسری جگہ پہنچایا جاسکتا ہے۔
کاواساکی کے خیال میں یہ روبوٹ دور دراز کے مقامات کے لیے استعمال کیا جاسکے گا جہاں اسے نگرانی اور حفاظت کے لیے بھی استعمال کیا جاسکتا ہے۔
