کراچی: شہر قائد کے علاقے عزیز آباد میں رائیڈر گینگ سرگرم ہو گیا ہے، جس نے بیک وقت کئی وارداتیں کی ہیں۔
رائیڈر گینگ کی جانب سے عزیز آباد میں موبائل فون چھیننے کی واردات کی فوٹیج سامنے آ گئی ہے، جس میں اسٹریٹ کرمنلز کو واردات کرتے دیکھا جا سکتا ہے۔
لٹیرے نے پولیس کو جھانسہ دینے کے لیے آن لائن بائیک سروس کا ہیلمٹ پہن رکھا تھا، جسے ویڈیو میں دیکھا جا سکتا ہے، اسٹریٹ کریمنلز کا گینگ رائیڈرز والی ہیلمٹ پہن کر وارداتیں کر رہا ہے۔
لٹیرے کے دوسرے ساتھی کو الگ موٹر سائیکل پر دیکھا جا سکتا ہے، اس گینگ نے عزیز آباد میں ایک اور واردات بھی کی، جس میں اس نے بینک سے رقم لے کر نکلنے والے شہری سے ساڑھے 3 لاکھ روپے چھینے ہیں۔
ذرائع کے مطابق یہ 9 رکنی گینگ ہے، جس میں نوجوان لڑکے شامل ہیں، جو موٹر سائیکلوں پر وارداتیں کرتے ہیں، اور واردات کے دوران یہ رائیڈرز جیسا حلیہ اختیار کرتے ہوئے ہیلمٹ یا اپر پہنتے ہیں، اور کراچی کے مختلف علاقوں میں چھینا جھپٹی کی وارداتیں کرتے ہیں۔
