لاہور: مسلسل بارشوں کے سبب پانی سے پھیلنے والی بیماریوں (واٹر بورن) کا خدشہ پیدا ہو گیا ہے، اس سلسلے میں سیکریٹری پرائمری اینڈ سیکنڈری ہیلتھ کیئر نے 8 اضلاع کے لیے الرٹ جاری کر دیا۔
تفصیلات کے مطابق سیکریٹری ہیلتھ کیئر نے ضلعی صحت حکام کو پانی سے پھیلنے والی بیماریوں کی روک تھام کے لیے اقدامات کرنے کی ہدایت جاری کر دی ہے۔
سیکریٹری کیپٹن (ر) محمد عثمان نے کہا کہ آلودہ پانی سے ڈائریا، گیسٹرو، ہیپاٹائٹس (اے اینڈ ای) اور ٹائیفائیڈ جیسی بیماریوں کے پھیلنے کا اندیشہ ہے، لاہور، گوجرانوالہ، راولپنڈی، سیالکوٹ، جہلم، سرگودھا، حافظ آباد اور فیصل آباد میں کیسز کی تعداد بڑھ سکتی ہے۔
انھوں نے ہدایت کی کہ ڈسٹرکٹ اسپتالوں کے ان ڈور اور آؤٹ ڈور علاج معالجہ کے تمام انتظامات یقینی بنائے جائیں، متوقع بیماریوں کے مریضوں کا تمام ریکارڈ ڈی ایس ایس ڈیش بورڈ پر فوری اپ لوڈ کیا جائے، اور ڈسٹرکٹ ریپڈ ریسپانس فورس ہنگامی صورت حال میں متاثرہ علاقوں میں فوری اقدامات کریں۔
سیکریٹری ہیلتھ نے فیلڈ ٹیموں کی مسلسل نگرانی کے ساتھ ساتھ ٹیموں کے حفاظتی اقدامات بھی یقینی بنانے کی ہدایت جاری کی، اور کہا اسپتالوں میں موجود ادویات کے اسٹاک کو چیک کیا جائے، تاکہ مریضوں کو مفت ادویات کی فراہمی یقینی ہو۔
انھوں نے موجودہ صورت حال کے پیش نظر آر آر ٹیز کو ہفتہ وار کارکردگی جائزہ اجلاس منعقد کرنے کی بھی ہدایت کی۔
