سعودی عرب میں ریاض میٹرو کا جزوی آغاز 27 نومبربروز بدھ سے کیا جارہا ہے، پہلے مرحلے میں تین روٹس کے لیے سروس کا آغاز کیا جائے گا۔
سعودی خبر رساں ادارے کی رپورٹ کے مطابق تین روٹس کے لیے سروس کا آغاز ہونے کے بعد دسمبر کے وسط تک مزید تین روٹس کے لیے سروس شروع کردی جائے گی۔
پہلے مرحلے میں العروبہ سے البطحا اور کنگ خالد ایئرپورٹ سے رنگ روڈ عبدالرحمان بن عوف اور شیخ حسن بن حسین تک ہو گا جو مکمل گنجائش کے ساتھ 27 نومبر سے شروع ہو گی۔
میٹرو سروس کا دوسرا مرحلہ جس کا آغاز دسمبر کے وسط میں ہوگا۔ یہ روٹ شاہ عبداللہ روڈ سے شاہ عبدالعزیز سٹی تک مسافروں کو سفر کی سہولت فراہم کرے گا۔
ذرائع کا کرایوں کے حوالے سے کہنا تھا کہ اس بارے میں اعلان چند روز میں کیا جائے گا۔
انتظامیہ کی کوشش ہے کہ کرایوں کو مناسب رکھا جائے۔ زیادہ سے زیادہ تعداد میں مسافروں کو سہولت فراہم کی جائے تاکہ سڑکوں پر ٹریفک ازدحام کی کیفیت کو بھی کم کرنے میں مدد مل سکے۔
یاد رہے کہ سعودی کابینہ نے اپریل 2012 میں ریاض میں ٹریفک کے مسائل کوکنٹرول کرنے کے لیے میٹرو منصوبے کی منظوری دی تھی جس کے بعد منصوبے پر کام کا آغاز کردیا گیا تھا۔
دوسری جانب سعودی عرب میں پبلک انویسٹمنٹ فنڈ سے قائم رئیل سٹیٹ کی ترقیاتی کمپنی ’روشن‘ کی جانب سے فیفا ورلڈ کپ 2034 کے لیے ریاض میں ’روشن اسٹیڈیم‘ کی تعمیر کے لیے ٹینڈرز طلب کر لیے گئے ہیں۔
اسٹیڈیم میں 46 ہزار سے زائد تماشائیوں کی گنجائش ہو گی، مجوزہ اسٹیڈیم 4 لاکھ 50 ہزار مربع میٹر پر محیط ہو گا۔
سعودی پبلک انویسٹمنٹ فنڈ سے روشن کمپنی کا قیام 2020 میں کیا گیا تھا۔ کمپنی نے مملکت کے وژن 2030 کے اہداف کے تحت مملکت کو سپورٹس کے حوالے سے عالمی سطح پر مقبول بنانے کے لیے نمایا کردار ادا کیا ہے۔
واضح رہے کہ سٹیڈیم سے ملحق دو رہائشی ہوٹلز، فاسٹ فوڈ اور ریستوران وغیرہ بھی تعمیر ہوں گے، مجوزہ اسٹیڈیم کی تعمیر انتہائی جدید خطوط پر کی جائے گی جس میں توانائی کے لیے سولر سسٹم کا استعمال کیا جائے گا۔
عمرہ زائرین کی مسجد الحرام میں بارش کے دوران نماز عصر کی ادائیگی
واضح رہے کہ فیفا ورلڈ کپ 2034 کے تحت 32 میچز کا انعقاد کیا جائے گا، جس کے لئے مملکت کے مختلف شہروں میں 11 اسٹیڈیم تعمیر کیے جائیں گے جن میں سے 8 اسٹیڈیم ریاض میں جبکہ دیگر جدہ، الخبر، ابھا اور نیوم میں تعمیر کئے جائیں گے۔
