کمسن ملازمہ تشدد کیس میں مرکزی ملزمہ سومیاعاصم نے ضمانت کی درخواست دائر کر دی۔
تفصیلات کے مطابق سومیا عاصم کی جانب سے ضمانت کیلئے سیشن عدالت سے رجوع کیا گیا ہے۔ سیشن عدالت نے پولیس کو 10 اگست کے لیے نوٹس جاری کر دیا۔
درخواست میں موقف اپنایا گیا ہے کہ ایف آئی آر میں لگائے گئے الزامات بے بنیاد، مبالغہ آرائی پر مبنی ہیں، کوئی شک نہیں رضوانہ والدین کی اجازت سےسومیا عاصم کےگھر رہائش پذیر تھیں لیکن سومیا عاصم کا رضوانہ کیساتھ رویہ ایسا ہی تھا جیسا ان کے اپنے بچوں کے ساتھ تھا۔
درخواست کے مطابق سومیا عاصم کیخلاف حقائق کو توڑ مروڑ پر پیش کیا گیا سومیا عاصم منفی مہم کے باعث زندگی اور موت کی کشمکش میں مبتلا ہیں، سومیا عاصم پڑھی لکھی اور شائستہ خاتون ہیں وہ بےگناہ ہیں اور انہیں مقدمے میں غلط طریقےسے شامل کیا گیا۔
درخواست میں کہا گیا ہے کہ ایسے کوئی شواہد نہیں جو سومیا عاصم کو لگائے گئے الزامات سےجوڑ سکیں سومیا عاصم کی مقدمےمیں شمولیت بدنیتی،مزموم مقاصد کے لئے ہے لہذا ضمانت بعداز گرفتاری کی درخواست منظور کی جائے۔
