کراچی میں دھرنوں سے راستوں کی بندش کے باعث پی آئی اے انتظامیہ نے پروازوں کو شیڈول کے مطابق چلانے کے لیے ایئرپورٹ کے اطراف میں رہنے والے فضائی عملے کی خصوصی ڈیوٹیاں لگا دیں۔
قومی ایئرلائن کی انتظامیہ نے جناح ٹرمینل کے اطراف میں رہنے والے فضائی عملے کو طلب کر لیا ہے، ملیر، شاہ فیصل کالونی، جناح گارڈن میں مقیم عملے کی پروازوں کی روانگی کے لیے خصوصی ڈیوٹیاں لگائی گئیں۔
ترجمان پی آئی اے کے مطابق شام کو کراچی سے ملک کے مختلف شہروں کو روانہ ہونے والی پروازیں روانہ کردی گئیں۔
ترجمان نے کہا کہ قومی ائرلائن کی پروازوں پرشہر کے دیگر مقامات سے عملے کو پہنچنے میں دشواری کا سامنا رہا تاہم پی آئی اے کی پروازیں معمول کے مطابق چل رہی ہیں۔
انہوں نے کہا کہ مسافر پی آئی اے کال سینٹر سے ائیرپورٹ روانگی سے قبل فلائٹس کی معلومات حاصل کریں۔
