انقرہ: بد ترین زلزلے کے باعث شام اور ترکیہ کو ملانے والی ایک مرکزی سڑک بھی تباہ ہو گئی، جس کی وجہ سے عالمی امداد کی ترسیل میں رکاوٹ پیدا ہو گئی۔
الجزیرہ کے مطابق زلزلے کے باعث ترکیے کے صوبے حاطے کو شام کے شہر حلب سے ملانے والی ایک مرکزی سڑک تباہ ہو گئی، سڑک میں بڑی بڑی دراڑیں پڑ گئی ہیں۔
اقوام متحدہ نے بھی کہا ہے کہ پیر کے زلزلے سے ترکی سے شام جانے والی واحد سرحدی گزر گاہ سے جان بچانے والی امداد کی ترسیل متاثر ہو گئی ہے۔ شاہراہ تباہ ہونے کی وجہ سے گاڑیاں پھنس گئی ہیں، اور شام میں عالمی امداد کی ترسیل میں مشکلات ہو رہی ہیں۔
اقوام متحدہ کے سیکریٹری جنرل انتونیو گوتیریس کے ترجمان اسٹیفن دوجارک نے کہا کہ باب الحوا کراسنگ خود ٹھیک ہے، تاہم، کراسنگ کی طرف جانے والی سڑک کو نقصان پہنچا ہے۔ ان کا کہنا تھا کہ سڑک کی حالت ایسی نہیں ہے کہ اسے پوری طرح سے استعمال کیا جا سکے۔
واضح رہے کہ شام اور ترکی میں پیر کے روز آنے والے زلزلے میں جاں بحق افراد کی تعداد 15 ہزار سے بڑھ گئی ہے، اور تاحال ہزاروں شہری ملبے تلے دبے امداد کے منتظر ہیں۔
