The news is by your side.

Advertisement

پیٹرول پمپ پر ڈاکوؤں نے تجوری توڑ کر رقم لوٹ لی (ویڈیو)

کراچی: شہر قائد میں ڈاکوؤں نے ایک ماہ میں تیسرا پیٹرول پمپ لوٹ لیا، ڈاکوؤں نے تجوری توڑ کر رقم لوٹی، جس کی فوٹیج اے آر وائی نیوز نے حاصل کر لی۔

تفصیلات کے مطابق کراچی کے علاقے سرجانی ٹاؤن تھانے کی حدود میں وارداتوں میں اضافہ ہو گیا ہے، ایک ماہ کے دوران تیسرا پیٹرول پمپ لوٹ لیا گیا۔

ڈاکوؤں کی یہ واردات سی سی ٹی وی کیمرے میں ریکارڈ ہو گئی، فوٹیج میں ڈاکوؤں کو تجوری توڑتے دیکھا جا سکتا ہے، فوٹیج دیکھ کر معلوم ہوتا ہے کہ ڈاکو کتنے اطمینان سے واردات کر جاتے ہیں۔

سرجانی کے پیٹرول پمپ پر عملے کو زمین پر لٹایا گیا ہے

یہ واردات پیر کی صبح 5 بجے کی گئی، منی ٹرک میں سوار ڈاکوؤں نے پمپ کی تجوری توڑی، اس سے قبل انھوں نے پمپ کے عملے کوگن پوائنٹ پر یرغمال بنایا اور پھر تجوری سے 2 لاکھ روپے سے زائد رقم لوٹ کر بہ آسانی فرار ہو گئے۔

ڈاکو ٹارچ کی روشنی میں اوزاروں کی مدد سے تجوری توڑ رہے ہیں

فوٹیج میں دیکھا جا سکتا ہے کہ صبح کے اندھیرے میں کمرے کے اندر عملے کو زمین پر لٹایا گیا ہے، اور ڈاکو ہتھوڑی اور دیگر اوزار کی مدد سے ٹار چ کی روشنی میں تجوری توڑ رہے ہیں۔

پاکستان پیٹرولیم ریٹیلرز ایسوسی ایشن کے چیئرمین سمیر نجم الحسن نے اس حوالے سے بتایا کہ ایک بار پھر ایک پیٹرول پمپ لوٹ لیا گیا، ایک ماہ میں پیٹرول پمپوں پر یہ تیسری ڈکیتی ہے۔

انھوں نے کہا پیر کی صبح 5 بجے شہزور میں سوار ڈاکوؤں نے پمپ کی تجوری توڑ کر رقم لوٹی اور فرار ہو گئے، انھوں نے بڑھتی وارداتوں پر تشویش کا اظہار کرتے ہوئے انتظامیہ سے مطالبہ کر دیا ہے کہ پیٹرول پمپوں پر ڈکیتیوں کی روک تھام کے لیے سیکورٹی دی جائے۔

Comments

یہ بھی پڑھیں