کراچی : شہر قائد میں ڈاکو بے لگام ہوگئے، سائٹ ایریا اور اورنگی میں نامعلوم مسلح ملزمان پیٹرول پمپس کے عملے سے ایک کروڑ 10 لاکھ روپے سے زائد کی رقم لوٹ کر فرار ہوگئے۔
تفصیلات کے مطابق نئے آئی جی سندھ راجہ رفعت مختار کے عہدہ سنبھالتے ہی شہر میں ڈکیتی کی 2 بڑی واردات کے دوران نامعلوم مسلح ملزمان پیٹرول پمپ کے عملے سے دن دیہاڑے ایک کروڑ 10 لاکھ روپے سے زائد کی رقم لوٹ کربا آسانی فرار ہونے میں کامیاب ہوگئے
شہر قائد میں مجموعی طور پر ڈکیتیوں کی تین بڑی وارداتیں ہوئیں، اورنگی ٹاؤن پاکستان بازار تھانے کی حدود میں ملزمان پیٹرول پمپ کے کیشئر سے 30 لاکھ روپے لوٹ کے فرار ہوگئے اور تھوڑی دیر بعد ایک اور واردات میں سائٹ ایریا میں پیٹرول پمپ کا کیش لے جانے والا عملہ 80 لاکھ روپے گنوا بیٹھا۔
ابراہیم حیدری میں ملزمان نے ہوٹل کے کیش کاؤنٹر سے چالیس ہزار روپے لوٹے اور مزاحمت پر ڈاکوؤں نے فائرنگ کرکے ہوٹل مالک کو شدید زخمی کردیا۔
واقعے کی سی سی ٹی فوٹیج میں دیکھا جاسکتا ہے کہ پٹرول پمپ ملازمین کار سے اترے تو مسلح ڈاکوؤں نے روکنے کی کوشش کی۔ پٹرول پمپ کے ملازم نے بھاگنا چاہا تو کیش سے بھرا تھیلا بینک کے دروازے پر گرگیا جسے ملزمان اٹھا کر ساتھ لے گئے، بینک کا گارڈ پستول لوڈ کرتا ہے لیکن فائر کرنے کے بجائے دروازہ لاک کردیتا ہے۔
اس حوالے سے ایس ایس پی کیماڑی فیضان علی کا کہنا ہے کہ واردات مشکوک لگتی ہے۔ پٹرول پمپ کے عملے سے پوچھ گچھ کی جارہی ہے۔
ادھر اورنگی ٹاؤن نشان حیدر چوک پر بھی دو ملزمان پٹرول پمپ کے عملے سے تیس لاکھ روپے لوٹ کر فرار ہوگئے۔ یہاں پر پٹرول پمپ کا عملہ رقم جمع کروانے بینک جارہا تھا۔
