رپورٹر: عدنان راجپوت
کراچی: شہر قائد میں خواتین سے ڈھائی لاکھ روپے نقدی اور زیورات کی ڈکیتی ہوئی ہے، متاثرہ شہری نے الزام لگایا ہے کہ پولیس نے واقعے کی اصل سی سی ٹی وی فوٹیج غائب کر دی ہے۔
تفصیلات کے مطابق کراچی کے علاقے واٹر پمپ چورنگی کے قریب گاڑی میں سوار خواتین سے ڈکیتی کی واردات ہوئی ہے، اس واردات کی سی سی ٹی وی فوٹیج اے آر وائی نیوز نے حاصل کر لی۔
واردات کے دوران موٹر سائیکل سوار 2 لٹیرے گاڑی میں بیٹھی خواتین سے زیورات اور ڈھائی لاکھ روپے نقد لوٹ کر فرار ہوئے، اس واقعے کا مقدمہ جوہر آباد تھانے میں گزشتہ روز اتوار کو درج کیا گیا ہے۔
مقدمے کے مطابق مدعی عادل نے بتایا کہ رات نو بجے کو وہ گاڑی میں والدہ، اہلیہ، بہن اور 3 بچوں کے ساتھ موجود تھے، جب وہ بیکری میں گئے تو ایک لٹیرے نے گن پوائنٹ پر طلائی انگوٹھیاں، ایک ڈائمنڈ انگوٹھی، موبائل فون اور ڈھائی لاکھ روپے نقد چھینے، جب کہ اس کے دو ساتھی موٹر سائیکل پر کھڑے رہے۔
مدعی نے الزام لگایا کہ بیکری کے باہر لگے کیمروں کی فوٹیج انھوں نے حاصل کر لی ہے، لیکن اصل فوٹیج پولیس نے غائب کر دی ہے، پولیس کا کہنا تھا کہ مزید فوٹیجز سٹی ڈسٹرکٹ گورنمنٹ کے کیمروں سے صبح حاصل ہوں گی۔
مدعی نے بتایا کہ پولیس اہل کاروں نے ان سے کہا کہ فوٹیج ملنے کے بعد ملزمان کی شناخت اور گرفتاری عمل میں لائی جائے گی۔
