ڈھاکہ: بنگلادیشی حکام کا کہنا ہے کہ میانمار سے آنے والے مزید پناہ گزینوں کو ملک میں داخل ہونے نہیں دیا جائے گا۔
تفصیلات کے مطابق بنگلادیش نے اقوام متحدہ کی سلامتی کونسل کو کہا ہے کہ وہ میانمار سے آنے والے مزید روہنگیا مہاجرین کو اپنے خطے میں جگہ نہیں دے گا۔
غیر ملکی خبر رساں ادارے کا کہنا ہے کہ بنگلادیش نے وہاں موجود روہنگیا مہاجرین کو بوجھ قرار دیتے ہوئے مزید روہنگیئن کی آمد پر ان کی کفالت سے انکار کردیا ہے۔
ملکی وزیرخارجہ شاہد الحق کا کہنا تھا کہ افسوس کے ساتھ سلامتی کونسل کو یہ بتانا پڑ رہا ہے کہ ان کا ملک میانمار کے مزید پناہ گزینوں کابوجھ نہیں اٹھا سکتا۔
گذشتہ سال جنوری میں میانمار اور بنگلادیش کے درمیان مہاجرین کی واپسی سے متعلق معاہدہ طے پایا تھا، میانمار کا کہنا تھا کہ ان کا ملک سلسلہ وار تارکین وطن کو ملک واپس لائے گا، البتہ بنگلادیش نے یہ کہہ کرانکار کردیا کہ ان کا ملک ایک ہی دفعہ تمام مہاجرین کو وطن واپس بھیجے گا۔
روہنگیا مسلمانوں کی نسل کشی پر میانمار فوج کے سربراہ کے خلاف مقدمہ ہونا چاہیے: سفیر اقوام متحدہ
یاد رہے کہ گذشتہ سال اگست میں برما کی ریاست رکھائن میں ملٹری آپریشن کے نام پر برمی فوج کی جانب سے روہنگیا مسلمانوں کی نسل کشی کی گئی تھی جس کے باعث مجبوراً لاکھوں روہنگیا مسلمان بنگلہ دیش ہجرت کر گئے تھے۔
علاوہ ازیں گذشتہ سال 9 مئی کو بنگلہ دیش کے دار الحکومت ڈھاکہ میں اسلامی تعاون کی تنظیم (او آئی سی) کا 45 واں اجلاس منعقد ہوا تھا جس میں مسلم ممالک کے رہنماؤں نے روہنگیا بحران کو مسلمانوں کی نسل کشی قرار دیا تھا۔
