بنگلہ دیش میں روہنگیا پناہ گزین کیمپ میں فائرنگ کا واقعہ پیش آیا جس میں 7 افراد ہلاک ہوگئے۔ فائرنگ انٹرنیشنل کریمنل کورٹ کے پروسیکیوٹر کے دورے کے بعد ہونے والی جھڑپوں میں کی گئی۔
عالمی خبرایجنسی کی رپورٹ کے مطابق مہاجرین کے کیمپ میں دو حریف گروپس اراکان روہنگیا سیلویشن آرمی (اے آر ایس اے) اور روہنگیا یک جہتی تنظیم (آر ایس او) کے درمیان خون ریز جھڑپوں کے تازہ واقعے میں 6 افراد مارے گئے۔
مہاجر کیمپوں میں سیکیورٹی کی ذمہ داری نبھانے والی مسلح پولیس بٹالین کے ترجمان فاروق احمد نے کہا کہ جمعے کو علی الصبح 5 افراد فائرنگ کے نتیجے میں جاں بحق ہوگئے۔
انہوں نے کہا کہ فائرنگ کے دوران مارے گئے تمام پانچوں افراد کمانڈر سمیت اے آر ایس اے کے ارکان تھے تاہم اس کے بعد سیکیورٹی میں اضافہ کردیا گیا ہے۔
اس سے قبل گزشتہ برس مذکورہ تنظیم کے لیڈر عطااللہ ابو عمار جنونی کو مشہور سماجی کارکن محب اللہ کے 2021 میں قتل کا ذمہ دار ٹھہرایا گیا تھا۔
عطااللہ ابو عمار جنونی اور اے آر ایس اے کے دیگر رہنماؤں پر گزشتہ برس نومبر میں بنگلہ دیش کے سینئر انٹیلی جینس افسر کے قتل کا الزام بھی عائد کیا گیا تھا۔
