راولاکوٹ: تتہ پانی کے مقام پر ایک مکان کی چھت گر گئی، جس کے ملبے تلے دب کر 10 افراد جاں بحق ہو گئے۔
تفصیلات کے مطابق آزاد کشمیر کے شہر راولاکوٹ میں تتہ پانی کے مقام پر مکان کی چھت گرنے سے دس افراد جاں بحق اور 3 زخمی ہوگئے۔
ریسکیو حکام کے مطابق جاں بحق افراد میں 7 بچے اور 3 خواتین شامل ہیں، متاثرہ مکان میں 2 خاندان رہائش پذیر تھے، جب کہ حادثے کے وقت کچھ مہمان بھی گھر میں موجود تھے۔
پونچھ کھکھریالی میں یہ حادثہ بارش کی وجہ سے پیش آیا، شدید بارش میں مکان کی چھت اچانک زمیں بوس ہو گئی، حادثے میں ملک افسر نامی شہری کے خاندان کے افراد جاں بحق ہوئے، جب کہ زخمیوں کو کوٹلی اسپتال منتقل کیا گیا ہے۔
وزیر اعظم آزاد کشمیر تنویر الیاس نے تتہ پانی میں دس افراد جاں بحق ہونے پر ان کے لواحقین سے دلی ہمدردی اور اظہار تعزیت کیا، اور مرحومین کے لیے دعائے مغفرت کی۔
وزیر اعظم آزاد کشمیر نے کہا کہ ہم جاں بحق افراد کے لواحقین کے دکھ میں برابر کے شریک ہیں، غم کی اس گھڑی میں ہم لواحقین کے ساتھ ہیں۔
