مسقط: عمان کی پولیس نے خبردار کیا ہے کہ گمراہ کن فون اور پیغامات کے ذریعے فراڈ سے بچا جائے اور اس حوالے سے فوری پولیس کو شکایت درج کروائی جائے۔
ٹائمز آف عمان کے مطابق عمان کی شاہی پولیس نے عوام کو کال اور میسجز کے ذریعے کیے جانے والے فراڈز کے بارے میں متنبہ کیا ہے۔
رائل پولیس کی جانب سے جاری کردہ ایک بیان میں کہا گیا ہے کہ ایسی تمام کالز اور سوشل میڈیا کے ذریعے آنے والے پیغامات کو نظر انداز کردیں جن میں کوئی خود کو کسی کمیونی کیشن ادارے یا بینک کا بتا کر آپ کا ذاتی ڈیٹا یا پن کوڈ طلب کرے۔
پولیس کے مطابق یہ بھی کہا جاسکتا ہے کہ آپ نے کسی قسم کا کوئی انعام جیتا ہے یا پھر فون کرنے والے کو آپ کی مالی مدد کی ضرورت ہے۔
عمان پولیس نے واضح کیا ہے کہ ایسی تمام کالز گمراہ کن ہوتی ہیں اور ان کی مطلوبہ معلومات فراہم کرنا لوگوں کو بھاری نقصان سے دو چار کرسکتا ہے۔
رائل پولیس کی جانب سے مزید کہا گیا ہے کہ اس طرح کی کالز کو رپورٹ کرنے کے لیے ڈائریکٹوریٹ جنرل آف انکوائریز اینڈ کرمنل انویسٹی گیشنز کے ہاٹ لائن نمبر پر رابطہ کیا جائے اور وہاں اطلاع دی جائے۔
