کراچی: پاکستان میں محرم الحرام کا چاند دیکھنے کیلئے رویت ہلال کمیٹی کا اجلاس آج ہوگا، چیئرمین رویت ہلال کمیٹی مفتی منیب الرحمان نئے اسلامی سال کے اغاز کا اعلان کریں گے۔
تفصیلات کے مطابق ماہِ محرم الحرام 1442ھ کا چاند دیکھنے کے لیے مرکزی رویت ہلال کمیٹی کا اجلاس آج محکمہ موسمیات کے دفتر کراچی میں ہوگا، رویت ہلال کمیٹی کے سربراہ مفتی منیب الرحمان اجلاس کی صدارت کریں گے۔
وزارت مذہبی امور کا کہنا ہے کہ زونل رویت ہلال کمیٹیوں کے اجلاس اپنے اپنے مقامات پر ہوں گے اور اسلام آبادکی زونل رویت ہلال کمیٹی کا اجلاس بیک وقت منعقد ہوگا جبکہ علما کی تکنیکی مدد کیلئے محکمہ موسمیات کے نمائندے بھی اجلاس میں شریک ہوں گے۔
اجلاس میں محرم الحرام کے چاند کی رویت کا فیصلہ کیا جائے اور چیئرمین رویت ہلال کمیٹی مفتی منیب الرحمان نئے اسلامی سال کے اغاز کا اعلان کریں گے، چاند نظر آنے کی صورت میں یکم محرم 21 اگست بروز جمعہ اور یوم عاشور 30 اگست کو ہوگا۔
خیال رہے نئے اسلامی سال کا آغازمحرم الحرام سے ہوتا ہے، ملک بھر میں محرم الحرام کے دوران سیکیورٹی کے سخت انتظامات کئے جا رہے ہیں جبکہ امن و امان کو یقینی بنانے کے لیے سیکیورٹی پلان تیار کرلیا گیا ہے۔
واضح رہے سعودی عرب میں محرم الحرام کا چاند نظر آنے کے بعد نئے اسلامی سال کا آغاز ہوگیا ہے۔
