مانچسٹر : برطانیہ میں برفباری کے طوفان نے تباہی مچادی، نظام زندگی درہم برہم ہوگیا، ایئرپورٹس بند اور متعدد پروازیں منسوخ کردی گئیں۔
تفصیلات کے مطابق برطانوی محکمہ موسمیات کی جانب سے کی گئی پیشگوئی درست ثابت ہوئی، برطانیہ میں ہونے والی طوفانی برفباری نے شہریوں کو گھروں میں محصور کردیا، مانچسٹر ائیرپورٹ بند کردیا گیا، درجنوں پروازیں معطل اور منسوخ ہوگئیں۔
اے آر وائی نیوز کے نمائندے کی رپورٹ کے مطابق برطانیہ میں درجہ حرارت منفی دس تک گرگیا ہے، سارے ملک میں برفباری کا سلسلہ جاری ہے، یلو وارننگ جاری کردی گئی ہے، اسکاٹ لینڈ انگلینڈ کے جنوب مشرق میں بھی سردی کی لہر جاری ہے۔
برطانیہ کی سول ایوی ایشن نے اپنے جاری بیان میں کہا ہے کہ شدید برفباری کے سبب مانچسٹر ائیرپورٹ کے دونوں رن ویز عارضی طورپر بند کردیے گئے ہیں، مسافروں سے کہا گیا ہے کہ جیسے ہی پروازیں دوبارہ شروع ہوں گی انہیں مطلع کردیا جائے گا۔
ائیرپورٹ انتظامیہ کے مطابق برف باری کے سبب رن ویز جزوی طور پر بندہیں جبکہ ڈبلن ائیرپورٹ پر بھی شدید برفباری کے سبب فلائٹ آپریشن جزوی معطل کیا ہوا ہے۔
برطانوی میڈیا کا کہنا ہے کہ شمالی برطانیہ کے بیشتر علاقوں میں گزشتہ رات ہلکی برف باری ہوئی جس کے باعث سردی کی شدت میں اضافہ ہوگیا۔ اگلے چند روز تک شدید سردی کی لہرجاری رہے گی۔
