ماسکو: روس کے صنعتی علاقے میں واقع رہائشی عمارت میں دھماکا ہوا جس کے نتیجے میں 4 افراد ہلاک ہوگئے جبکہ متعدد افراد ملبے تلے دب گئے ہیں۔
غیرملکی خبررساں ادارے کے مطابق روس کے مشرقی شہر کی رہائشی عمارت میں گیس دھماکے کے نتیجے میں 4 افراد ہلاک ہوگئے جبکہ متعدد افراد ملبے تلے دب گئے ہیں، روسی صدر پیوٹن صورت حال کا جائزہ لینے کے لیے جائے وقوعہ پر پہنچ گئے۔
ریسکیو اداروں نے کسی ممکنہ ہنگامی صورت حال کے خدشے کے پیش نظر قریبی عمارتوں کو خالی کرالیا ہے، بھاری مشینری کے ذریعے ملبے کو ہٹانے کا کام جاری ہے، اسپتال میں ایمرجنسی نافذ کردی گئی ہے۔
شہریوں کا کہنا ہے کہ گیس لیک ہونے سے اس عمارت میں دھماکا ہوا ہے جس سے اس کا آدھا حصہ منہدم ہوگیا اس کے بعد سے متعدد افراد لاپتا ہیں۔
میڈیا رپورٹس کے مطابق اس عمارت کے 48 فلیٹس گیس دھماکے کے بعد منہدم ہوگئے ہیں 120 افراد فلیٹس میں رہائش پذیر ہیں جبکہ شدید سردی کے سبب ریسکیو اہلکاروں کو امدادی کاموں میں دشواری کا سامنا ہے۔
مزید پڑھیں: جرمنی: رہائشی عمارت میں دھماکہ، تین افراد ہلاک
مقامی حکام کا کہنا ہے 35 افراد اب بھی لاپتا ہیں تاہم یہ واضح نہیں ہوسکا ہے کہ جب دھماکا ہوا تو یہ افراد عمارت کے اندر موجود تھے یا نہیں۔
واضح رہے کہ روس کی عمارتوں میں گیس دھماکوں کے واقعات عام ہیں جس کا ذمہ دار انتظامیہ کی خراب کارکردگی کو قرار دیا جارہا ہے۔
