روس کی وزارت دفاع کی جانب سے دعویٰ کیا جارہا ہے کہ روسی فوج نے مشرقی یوکرین میں حملے تیز کر کے، اس کے فوجیوں نے یوکرین کے علاقے دونیتسک کے تزویراتی اعتبار سے ایک اہم قصبے پر قبضہ کر لیا ہے۔

بین الاقوامی خبر رساں ادارے کی رپورٹ کے مطابق روسی وزارت دفاع نے اعلان کرتے ہوئے کہا کہ اس نے یوکرینی افواج کے مضبوط گڑھ ولائیکا نووسِلکا پر کنٹرول حاصل کرلیا ہے۔

ماہرین کے حوالے سے یوکرینی ذرائع ابلاغ کا کہنا تھا کہ روسی فوجی وہاں سے مزید پیشرفت کر سکتے ہیں۔

دریں اثنا، یوکرین کی فوج کے جنرل اسٹاف کا کہنا تھا کہ انہوں نے روسی علاقے ریازن میں تیل صاف کرنے کے کارخانے پر حملے کے لیے ڈرونز استعمال کیے ہیں۔

اطلاعات کے مطابق یہ تنصیب روسی فوجی طیاروں کے لیے ایندھن تیار کرتی ہے۔ خطے کے گورنر نے سوشل میڈیا پر پوسٹ کیا کہ حکام نقصان کا جائزہ لے رہے ہیں۔

سوشل میڈیا پوسٹ میں یوکرین کے صدر وولودیمیر زیلنسکی کا کہنا تھا کہ روسی افواج نے گزشتہ ایک ہفتے کے دوران سینکڑوں حملے کیے ہیں، جن میں تقریباً 750 سے زیادہ ڈرونز،1 ہزار 250 فضائی بم اور مختلف اقسام کے 20 سے زیادہ میزائل استعمال کیے گئے۔

چین اور بھارت فضائی سروس دوبارہ شروع کرنے پر رضامند

یوکرینی صدر کے مطابق صرف عزم ہی ایسے دہشت گردوں کو روک سکتا ہے، انہوں نے ممالک پر زور دیا کہ وہ طویل فاصلے تک مار کرنے کی صلاحیتوں کے حامل ہتھیار بھیجنے سمیت یوکرین کو حمایت فراہم کریں۔