وزیرنجکاری، سرمایہ کاری بورڈ نے کہا ہے کہ تجارتی فروغ کیلئے روس اور سینٹرل ایشیا کو کراچی پورٹ سے منسلک کرنا چاہتے ہیں۔
روسی سفیر البرٹ پی خوریف اور وزیرنجکاری، سرمایہ کاری بورڈ علیم خان کی ملاقات ہوئی، روسی سفیر اور وفاقی وزیر علیم خان میں باہمی دلچسپی کے مختلف امور پر تبادلہ خیال ہوا، علیم خان کا کہنا تھا کہ پاکستان کیلئے روس معاشی اور جغرافیائی لحاظ سے انتہائی اہمیت کا حامل ہے۔
ان کا کہنا تھا کہ وسط ایشیائی ممالک اور جنوبی ایشیا کے ملکوں میں رابطے اہمیت کے حامل ہیں، علیم خان اور روسی سفیر کے درمیان مختلف شعبوں میں دوطرفہ عملی پیش رفت پر بھی اتفاق ہوا۔
وفاقی وزیرسرمایہ کاری بورڈ نے روس کے سفیر کو اپنے حالیہ دورہ سینٹرل ایشیا سے بھی آگاہی فراہم کی، روسی سفیر نے کہا کہ روس پاکستان کو مختلف منصوبوں میں مالی اور تکنیکی معاونت فراہم کرنے کا خواہشمند ہے۔
البرٹ پی خوریف نے کہا کہ چین پاکستان، سینٹرل ایشیائی ممالک کا روس تک نیٹ ورک انتہائی اہم ہے، تاجکستان، ازبکستان اور افغانستان کے راستے پاکستان تک زمینی رابطہ چاہتے ہیں،
روسی سفیر نے کہا کہ موجود ہ حالات میں پاکستان کو خطے میں تجارتی لحاظ سے انتہائی اہمیت حاصل ہے، روس پاکستان کیساتھ اسٹریٹجک پارٹنر کے طور پر کام کرنا چاہتا ہے،
دونوں رہنماؤں کے درمیان ملاقات میں اسلام آباد اور کراچی سے ماسکو تک دو طرفہ فلائٹ آپریشن کے حوالے سے تبادلہ خیال ہوا۔
