اقوام متحدہ سلامتی کونسل کا غزہ کی صورتحال کے حوالے سے اجلاس جاری ہے، روس نے فلسطین کو مکمل رکنیت دینے کی حمایت کردی۔
تفصیلات کے مطابق سلامتی کونسل کے اجلاس کے دوران روسی مندوب کا کہنا تھا کہ فلسطین کو تسلیم کرنے سے خطے میں امن کی راہ ہموارہوگی، روس فلسطین کو اقوام متحدہ کی مکمل رکنیت دینے کی حمایت کرتا ہے۔
یو این سیکریٹری جنرل انتونیو گوتریس نے کہا کہ اسرائیل غزہ میں امداد، خوراک، ادویات جانے نہیں دے رہا، غزہ والوں کو خوراک کی سب سے زیادہ ضرورت ہے۔
چینی مندوب نے کہا کہ اسرائیل کو رفح پر حملے کا منصوبہ ترک کردینا چاہیے، اسرائیل یواین قراردادوں پر عمل کرے، امداد فراہمی کی اجازت دے۔
علاوہ ازیں عرب میڈیا نے کہا ہے کہ قطرغزہ امن مذاکرات کی ثالثی سے دستبردار ہوسکتا ہے، قطر نے مذاکرات کی ناکامی کی وجہ فریقین کے سیاسی مفادات کو قرار دیا ہے۔
قطری وزیراعظم کا اس حوالے سے اپنے بیان میں کہنا ہے کہ غزہ امن مذاکرات میں ثالثی کے کردار پر نظرثانی کررہے ہیں۔
دریں اثنا رفح میں کیمپ پر اسرائیلی بمباری سے 5 بچوں سمیت 11 افراد شہید ہوگئے، غزہ میں شہادتوں کی مجموعی تعداد 33 ہزار 970 ہوگئی۔
فلسطین کے محکمہ صحت کا کہنا ہے کہ غزہ کے الشفا اسپتال کے قریب سے اجتماعی قبر دریافت ہوئی ہے۔ اجتماعی قبر سے اب تک 30 لاشیں نکالی جاچکی ہیں۔
