ماسکو: روس نے مرمتی کام کا جواز بنا کر جرمنی کو ایک بار پھر گیس سپلائی عارضی طور پر معطل کردی ہے۔
غیر ملکی میڈیا کے مطابق روس کی سرکاری توانائی کمپنی گیز پروم کا کہنا ہے کہ نارڈ اسٹریم گیس سپلائی مرمتی کام کے لیے روکی گئی ہے، گیس کمپریسر یونٹ پر آج سے کام شروع کیا جائے گا جو تین روز جاری رہے گا۔
توانائی کمپنی کا کہنا ہے کہ سپلائی میں تعطلی معمول کی دیکھ بھال کے لیے ضروری ہیں لیکن روس پر مغربی پابندیوں کی وجہ سے سامان کی ترسیل کی پیچیدگیوں کی وجہ سے اس میں اضافہ ہوا ہے۔
دوسری جانب جرمنی سمیت یورپی ممالک کا موقف ہے کہ روس توانائی ذرائع کو یورپ کے خلاف بطور ہتھیار استعمال کررہا ہے۔
جرمنی کی فیڈرل نیٹ ورک ایجنسی کے سربراہ کلاؤس مولر نے روس کی جانب سے گیس بندش کو "تکنیکی طور پر ناقابل فہم” قرار دیا ہے، انہوں نے کہا کہ تجربہ ظاہر کرتا ہے ماسکو "دیکھ بھال کے نام پر سیاسی فیصلہ کررہا ہے”۔
انہوں نے کہا کہ وہ ممکنہ بندش کیلئے پہلے سے تیار ہیں، جرمنی کے پاس گیس کا 85 فیصد ذخیرہ موجود ہے، جو سردیوں میں بھی استعمال ہوسکتا ہے۔
کلاؤس مولر نے کہا کہ گیس کی بچت کر رہے ہیں، ایل این جی کے ٹرمینلز بھی آ رہے ہیں، بیلجیئم، نیدرلینڈز اور ناروے کی بدولت گیس ضروریات پوری ہو رہی ہیں۔
