روس نے فن لینڈ کو نیٹو میں شامل کرنے کے معاملے پر امریکا اور برطانیہ کو ایٹمی حملے کی دھمکی دے دی ہے۔
برطانوی میڈیا کے مطابق روس نے فن لینڈ کے نارتھ اٹلانٹک ٹریٹی آرگنائزیشن (نیٹو) میں شمولیت کے معاملے پر فن لینڈ سمیت امریکا اور برطانیہ کو سپر سانک میزائل سے نشانہ بنانے کی دھمکی دیتے ہوئے کہا ہے کہ روس کی سلامتی کو خطرہ ہوا تو جوہری ہتھیاروں کا استعمال کرسکتے ہیں۔
برطانوی میڈیا کی رپورٹ کے مطابق روسی دفاعی کمیٹی کے نائب چیئرمین الیکسی زووراولیوف کا کہنا ہے کہ فن لینڈ کو نیٹو میں شمولیت کے لیے امریکا اور برطانیہ نے اُکسایا ہے ساتھ ہی یہ بھی تنبیہہ کی کہ فن لینڈ کو 10 سیکنڈز میں Satan-2 میزائل سے نشانہ بناسکتے ہیں۔
روسی دفاعی کمیٹی کے نائب چیئرمین کا کہنا تھا کہ امریکا نے روس کو دھمکی دی تو یہی روسی میزائل امریکا کے لیے ہوگا اور امریکا سے جوہری راکھ نکلے گی۔
الیکسی زووراولیوف نے برطانیہ کو دھمکی دیتے ہوئے کہا کہ سیٹن ٹو 200 سیکنڈز میں برطانیہ پہنچ سکتا ہے۔
ادھر روس نے فن لینڈ کے لیے بجلی کی فراہمی معطل کردی ہے۔ بجلی معطل کیے جانے سے قبل روسی انرجی فرم نے بقایاجات کی ادائیگی نہ ہونے کے سبب سپلائی منقطع ہونے کی دھمکی دی تھی۔
