روس اور یوکرین کے درمیان جنگ میں بھارت کی ریاست تلنگانہ کے شہر حیدر آباد سے تعلق رکھنے والا مسلمان نوجوان جاں بحق ہوگیا۔
میڈیا رپورٹس کے مطابق جاں بحق ہونے والے نوجوان کی شناخت 30 سالہ محمد اصفان کے نام سے ہوئی جسے ٹریول ایجنٹ ملازمت کا دھوکا دے کر روس لے گئے تھے۔
ٹریول ایجنٹ نے محمد اصفان کو روسی فوج میں بھرتی کروا دیا تھا جس کے بعد نوجوان کے پاس یوکرین کے خلاف جنگ میں حصہ لینے کے کوئی اور راستہ نہیں تھا۔
بھارتی وزارت خارجہ نے بھی محمد اصفان کے جاں بحق ہونے کی تصدیق کی۔
رکن پارلیمنٹ اسد الدین اویسی نے روس میں بھارتی سفارت خانے کو خط لکھا تھا جس میں ان کا کہنا تھا کہ حیدر آباد کے تین نوجوانوں کو نوکری کا جھانسہ دے کر روسی فوج میں بھرتی کروایا گیا۔
محمد اصفان کے جاں بحق ہونے سے کچھ روز قبل وزارت خارجہ نے اپنے بیان میں بتایا تھا کہ 20 سے 30 بھارتی شہریوں کو واپس لانے کی کوشش کی جا رہی ہے۔
